【一班葡萄友】反中網民玻璃心,唔抵得國家成功救人?
【一班葡萄友】反中網民玻璃心,唔抵得國家成功救人?

近日其中一條最HIT嘅新聞,係由於一眾受風災影響而被困日本關西機場嘅過千名中國國民,喺中國駐大阪領事館同日本當局積極溝通協調下,成功獲安排乘搭大巴士直接由機場送出大阪市區。領事館咁貼心嘅服務,正常人讚好都嚟唔切啦,偏偏竟然有部份非常「玻璃心」嘅反中葡萄友,無啦啦彈出嚟亂鬧一番,囍雨見到啲留言,真係覺得好好笑,好想親口同嗰班人講:「好酸呀,節省少少啦!」

安排過千旅客撤離

中國駐大阪領事館今次做得其實真係非常唔錯,首先,今次被困關西機場嘅中國國民足足有1,044人,中國領事人員深明「一個都不能少」嘅道理,足足安排咗15部旅遊巴士接載,結果係非常短時間內就完全撤走晒被困嘅中國國民,你話抵唔抵讚先!仲有喎,喺呢1,044個旅客入面,港、澳、台旅客其實亦佔咗154人,身為香港人嘅囍雨一方面擔心旅客安全啦,但另一方面亦都覺得好自豪!

好喇,咁到底班逢中必反嘅葡萄友話咩呢?其中一個話:「其實當晚日本方面已經疏散所有旅客。如果覺得一架巴士早半日走就要謝主隆恩,我只係覺得中國人奴性真係太強。」嗱,呢啲咪吹得就吹、講得就講囉,日本當晚已經疏散所有旅客?你真係唔知,定係太無知呀?關西機場9月4日被吹襲,其他國家旅客一直到9月5號下午都仲排緊隊搭「官方巴士」,而「官方巴士」係會將旅客送到一個港口,再搭船離開機場,而且因為運載力不足,一般旅客平均都要等好耐先上到交通工具,可以話係非常「折騰」。

領事館職員不求「多謝」

再者,據獲救嘅旅客講,中國領事館職員並冇要求人哋多謝佢囉,話乜乜「謝主隆恩」,除咗係廢話之外,根本就係侮辱晒嗰班被困嘅旅客,同埋一班盡心盡力服務國民嘅領事館職員。教精你班葡萄友啦,呢啲唔係叫「謝主隆恩」,多謝救咗自己嘅人,呢個係叫感恩、係一種禮貌同修養囉。

除咗上面呢個葡萄友外,另一名葡萄友就話:「要人認自己中國人先救,咁有幾偉大呀?好唔人道囉!」唉,呢位葡萄友如果唔係無知,就肯定係玻璃心碎滿一地,搞到睇唔清事實;首先,一個國家領事館喺天災時候,先援助咗自己國民,到底有乜問題?呢個係國際標準,你唔識,係你無知啫。再者,今次中國領事館救內地、香港、澳門同台灣旅客,根本就冇叫過人認中國人,只要你係兩岸四地人民,希望獲得中國援助,你就可以立刻上車,請問又有乜問題呢?

災難當前「有救無類」 只要願意立刻施援

講真,一個人身處外國,若果祖國唔夠強大,一旦不幸遇到大型意外,真係冇人可以幫到你。先唔好講當地政府會唔會救死扶傷或者施以援助,剩係嗰種徬徨同無助,已經足夠折磨到受害者不似人形;呢個世界冇人可以迫到你認做中國人,而就算你平時唔認係中國人都好,一旦喺國外遇上類似意外,中國領事館都一樣係「有救無類」,除非你自己拒絕人哋支援囉,否則其實都係一視同仁。今日香港仍然有人會唔認中國人,唔緊要,放長雙眼,大家就會知道有「國家」,其實係幾咁重要。

原圖:新華網

92
支持
3
搞笑咩
6
嬲爆
8
超無奈
20
好好笑

評論