前排有中國旅客喺泰國遇上沉船意外，造成超過40人遇難、6人失蹤，《蘋果日報》個「文痞」李怡竟然用「自作孽」形容事件，嗰種幸災樂禍嘅心態可以話非常冇人性。今日，囍雨又喺報紙見到佢有新文章，今次佢冇話中國人「自作孽」，但就片面引用內地網民評論中美貿易戰嘅網上留言，內容大槪係指「亡國」唔緊要，「可怕的是亡給誰？」。李文痞將「去中國化」推到另一個極致，甚至希望中國「亡國」，用心之歹毒、行為之卑劣，實在令人側目！

把中國地方割讓給美國

李文痞文章嘅所謂切入點，就係引用所謂內地網民嘅留言，指內地網友希望能用割地解決中美貿易糾紛，包括山東人願意「犧牲山東」、蘇浙同廣東都願意「被納入美國成為美國一個州」，又指香港人已經犧牲100多年，「應該有一段長時間去享受母愛」；唔只咁喎，李文痞仲話日本二次戰敗後被美國佔領，結果「亡國」亡出「言論自由」、「選票」同「民富國強」。

睇完李文痞嘅文章，老老實實，真係想唔話呢種人「奴才」都唔得。佢樂於睇到中國國土分裂，言論本身已經係天地不容、令人髮指；但李文痞唔只咁，呢個人仲衰到去抽取一小撮網民嘅意見，就當晒全中國裝網民都好似佢咁想做「下等人」，呢種以偏概全嘅手法，完完全全秉承《蘋果日報》凡事炒作、誇大嘅報格；舉個反例，今時今日網上都經常見到有人鬧《蘋果日報》搞風搞雨、唯恐天下不亂、應該立刻摺埋等等，咁唔通囍雨又可以話「全香港人都痛恨《蘋果日報》」呀？唔好玩啦，李文痞！

「去中國化」嘅極致

之前中國旅客喺泰國遇難，李文痞用「自作孽」形容遇難人士，一副「中國人死也是咎由自取」嘅嘴臉，「去中國化」去到連基本人性都冇；如果中國人不幸身亡都係一件值得「揶揄」嘅事，囍雨又好奇點解李文痞做乜突然又咁關心內地網民講啲咩呢？係咪只要有機會「反中」，佢就咩都唔顧，總知「有水抽」就「抽」咗先呢？

歸根究柢，李文痞之所以會「笑」中國人死、會借個別內地網民把口指「亡國」都唔緊要，一切都係同佢凡事「反中」，誓要「去中國化」嘅政治立場一脈相承；囍雨未喺美國生活過，唔知當地生活係唔係真係好似伊甸園咁好；囍雨只係知道，如果中國「亡國」的話，十幾億人就會流離失所，而且幾乎肯定會生靈塗炭、血流成河，對於覺得「凡是中國人都抵死」嘅李文痞或者唔係乜嘢大事，但對於全世界最大部份仲有做人基本良知嘅人嚟講，肯定都唔會想呢個情況發生。李文痞連做人都冇資格，仲學咩人講政治吖，算把啦！

原圖：RTHK