「傑哥，又係要法治呀？」傑哥：「我剩係想要份蛋治啫！」想當年某泛民立法會議員喺網上既影片廣告，話畀人聽佢既要法治，又要蛋治（即民生）。雖然好多人睇完條片都狂插唔知佢噏乜，話傑哥應該炒晒班PR，廣男就覺得條片其實都算唔錯，起碼用少少時間就話到畀人聽傑哥對法治同民生一樣重視。但時至今日，果啲標榜法治既議員，似乎唔buy法治喇 ……

近期不少新聞，都見到有泛民政黨、青年團體話如果普選無公民提名元素，就要公民抗命，甚至罷課罷工。老老實實，如果你問廣男，廣男都會答你公民提名一定最吸引，原因好簡單，就係我唔單止可以投票選特首，仲可以提名埋一份，學傑哥話齋，「有得揀，先至係老闆」。但諗深一層，又發覺堅持公民提名唔多妥，原因一字咁淺，因為公民提名唔符合《基本法》規定。

唔少反對政府既人士，都成日話反對人治要法治，咁既話矛盾就嚟喇。依照呢個捍衛法治既邏輯，如果根據《基本法》規定依法推動普選，先係符合法治既精神，正如大律師公會、香港律師會都講過公民提名違反《基本法》；相反，如果因為部分香港人既訴求或者某些政團既意志而放棄依法普選，會唔會變咗人治呢？

法治作為香港其中一種核心價值，總唔可以認為佢係好既時候就擁抱佢，覺得同自己諗法唔一樣既時候就擺脫佢。針無兩頭利，如果面前有兩個選擇，一係依法普選，一係堅持公民提名但無普選，廣男一定會揀前者；咁揀法唔係因為廣男現實或死守法律，而係2017年普選方法唔係最終方法，可以先落實再完善，若然2017年實現唔到普選，下次再傾政改係幾時呢？

今日有人因為種種原因唔尊重法治，冰山一角既例子看似無關痛癢，其實後果堪虞；如果個個有理由就可以擺脫法治，香港會點？會輸囉！

原圖：hbbs.mychat.to