中國科技發展快 美國驚驚?
中國科技發展快 美國驚驚?

最近,廣男由於工作需要,去電訊服務公司Upgrade咗個電話Plan,將每月數據用量增加咗一倍之餘,速度亦由4G提升到4.5G,感覺非常之良好,因為廣男喺街度睇片嘅時候,唔再需要「疾下疾下」,成日等佢Load好條片。講開移動通訊,今日廣男睇新聞,見到有傳媒聲稱取得美國政府文件,話特朗普政府正研究設立國營5G流動通網絡嘅可行性,話要防範中國間諜活動同喺資訊科技方面同中國較量,仲話中國將會喺5G同人工智能取得全球領導地位咁話。報道咁講法,即係美國府驚畀中國超越?定係純粹「出口術」,借機打擊、批評中國一番呢?


防範間諜 一己之見?


首先,如果有關報道係屬實,美國政府話怕畀中國啲間諜活動或者截取通訊嘅話,廣男第一個反應就係,美國政府咁講係咪有根據嘅先?可能佢哋真係想設立由國家營運或者開發嘅5G網絡,但理由係咪真係中國政府呢?美國政府嘅確實諗法廣男梗係唔知啦,但客觀效果就係話畀人聽,美國嘅國防同通訊可能會畀中國Hack,叫大家小心啲。不過,呢啲都只係美國單方面嘅講法,大家都見唔到證據,反而果時「斯洛登事件」就話畀大家聽,真正監聽緊全世界嘅,係美國佬至真!


至於美國擔心5G、人工智能或者其他資訊科技會畀中國超越,廣男又信多啲喎!以中國手機品牌「華為」為例,佢哋嘅手機有先進嘅螢幕、特殊嘅人工智能晶片同合理嘅價格,係全球暢銷嘅手機品牌之一,暢銷以及矚目嘅程度,據消息指連美國聯邦通信委員會,都對「華為」手機喺美國銷售表示憂慮,令到美國有通訊公司取消同「華為」合作。當美國一方面話中國並非以「市場導向」嘅時候,其實美國嘅「保護主義」色彩都相當之濃厚啫。


打擊中國及「一帶一路」


有媒體指,美國之所以想研究國家營運嘅5G網絡,其中一個目的係要抗衡中國「一帶一路」倡議,應對中國「新殖民行為」;其實呢,中國唔係美國或者以前果啲「列強」,比較喜歡和平崛起,同其他國家合作、共贏,亦都唔係咩帝國主義。美國可能要令自「Great Again」,但下下咁諗其他國家,會唔會有啲陰謀論呢?


原圖:zhake100

評論