政府喺今年《施政報告》推出措施，招募青年做政策研究，同畀佢哋自薦加入諮詢委員會。一系列措施，反映政府有實質行動吸納青年意見，可惜，前學聯副秘書長岑敖暉就大大聲反對，佢近日就用「威權社會」形容香港，質疑畀青年自薦加入委員會做唔做到「分享權力」，甚至以「收買政策」形容計劃；民間民間青年政策倡議平台幹事何慧詩就話特首林鄭月娥「擺青年上枱」、係「政治花瓶」。試都唔試就話人「收買」？呢啲「陰謀論」熟口熟面喎！

青年委員會升格 可跨局處理青年事務

根據岑敖暉、何慧詩嘅講法，佢哋無非都係想講政府吸納青年意見係「政治化妝」，唔係有心聽青年人意見；不過，如果有留意政府政策嘅細節，都會知道喺明年初「青年事務委員會」將會升為由政務司司長統籌嘅「青年發展委員會」，即係話到時青年政策由更高層次嘅官員主理，甚至可以跨政策局處理青年問題，如果政府冇心吸納青年意見或者力量，有需要刻意將「青年事務委員會」升格？

政策仲未正式執行，岑敖暉等人就急不及待否定，真係好矛盾；以前政策、官方系統未能夠更廣泛吸納青年入去嘅時候，盲反派班人就話政府唔理青年人，到開始推出青年政策，甚至叫青年自薦入政府時，佢哋又話政府「做Show」，咁佢哋到底想點？既然而家有機會參與、發聲，佢哋如果有膽量、勇氣，大可試下自薦，嘗試入去睇下政府有冇吸納青年意見。一味「企喺門口」鬧政府入面嘅人，其實真係無乜意思！

寧願瞓街示威 不願參與制訂政策？

對於政府是否會真的採納青年意見，並反映在政策制訂方面，各方當然可繼續觀察，聽其言、觀其行；廣男就覺得，如果盲反派班青年同佢哋嘅同路人真係要一看政府嘅虛實，大可嘗試申請加入有關委員會或者「創新與統籌辦」，若係「貨不對辦」，到時離開都唔遲，何必試都唔試就話唔得呢？難道佢哋寧願跑在街頭搞示威衝擊、都唔願意好好坐低向政府提建議、制訂真正適合或解決香港問題嘅政策？瞓街好，定係對話好？唔係咁難判斷呀？！正如「青年事務委員會」主席劉鳴煒話齋，青年唔係社會上唯一持份者，亦都唔係「大晒」，想政府聽青年意見，第一件事唔係應該透過正式渠道將意見話畀政府知咩？

原圖：RTHK