早前中文大學出現「港獨」宣傳品風波期間，佢哋嗰位學生會前會長周竪峰喺阻止內地生移除「港獨」海報時，竟以大量粗言穢語辱罵對方，更多次以「支那」辱罵內地同學，結果引起全城公憤，大學方面亦展開了調查。有傳媒報道，周竪峰所屬的新亞書院學生紀律委員會最終只決定「警誡」周竪峰，原因係佢已經「反省」自己言行云云。是咁的，周竪峰有冇真誠反省，外人唔係佢肚裡面條蟲，當然唔會知，但觀乎佢社交網站內容，如果話佢有「反省」的話，似乎未必咁準確囉！

周竪峰仍然侮辱中國人？

先旨聲明，廣男完全冇點樣重罰甚至想中大踢周竪峰出校嘅意思，認為學生做錯事應該給予機會，而唔係一下子就重罰。不過，如果報道屬實的話，咁照理周竪峰就算唔認「中國人」，亦唔應該繼續侮辱中國人吖，何解佢兩個星期前喺個人Facebook又會有以下言論呢？佢話：「老實呀，唔係話每個中國人都係卑賤醜陋的野蠻人，但係中國人當中卑賤醜陋的野蠻人比率係Empirically High囉！」

廣男係一個IT人，IT人就最講道理，周前會長如果要辯稱以上說話唔係侮辱的話，咁講佢拎出證據來，證明「中國人當中卑賤醜陋的野蠻人比率係Empirically High」。若然佢證明唔到的話，對唔住，呢番言論就係肯肯定係侮辱全球所有中國人囉。

講返佢疑似被新亞書院學生紀律委員會「警誡」一事，廣男當然冇資格干預校方調查，不過如果校方係冇留意到周竪峰Facebook上種種言論的話，或者都可以花少少時間留意吓，或者會得出其他結論都唔定架。侮辱一個民族呢，有時又未必一定要用禁忌詞彙先算數，如果周竪峰以為唔用「支那」兩個字就唔叫侮辱的話，廣男真係好懷疑佢呢幾年喺大學學咗啲乜。

侮辱華人不是小事

老實講，用「支那」呢啲侮辱華人嘅字句侮辱人絕對唔係小事，上年梁頌恆、游蕙禎喺立法會宣誓時用「支那」侮辱全球華人，幾乎引起全世界華人譴責；而家周竪峰仲咁得戚喺Facebook話中國人唔少「卑賤醜陋」，擺明就係用「另一方式」繼續侮辱中國人！廣男就覺得，周竪峰好應該畀公眾一個交代，如果真係咁有膽量，就唔該唔好再做鍵盤戰士，大大方方行出嚟話：「係呀，我係辱華喎！」一方面喺學生紀律委員會就「反省」、一方面又繼續辱華，呢班本土派大學生真「小家」！

原圖：RTHK