今屆政府日前發表任內第一份《施政報告》，當中提到會檢討「限奶令」，以及研究保障本地配方粉穩定供應嘅長遠措施。消息一傳出，無論係建制、盲反派都紛紛走出嚟反對撤銷「限奶令」，唔少市民都認為「限奶令」執行得好地地，點解要檢討佢呢？廣男唔係政策制訂者，但作為家中親人有小孩，曾經深受「撲奶粉」之苦嘅香港人，就對撤銷有保留喇！

新界人搵奶粉搵到香港島？

2013年年尾，廣男家中一個兄弟旦下麟兒，喺全家人都非常欣喜之時，就開始為「撲奶粉」而苦惱喇。其實喺果時，時任特首梁振英已經推出「限奶令」，奶粉供應嘅問題已經有所改善，但家住新界西北嘅廣男同屋企人依然喺屋企附近買唔到初生嬰兒嘅奶粉，屯門、元朗、天水圍？冇！上水、粉嶺呢？一樣冇！到最後廣男要託朋友喺大埔先勉強買到一罐奶粉，啲奶粉俗啲講句「真係有錢都買唔到」！尤有甚者，廣男聽聞有人「撲奶粉」要「撲」到出香港島，可以想像得到，如果冇「限奶令」，情況會係點呢？

「限奶令」至今已經實施了四年多，今次政府提出會檢討「限奶令」實在無可厚非，措施運作一段時間，作出檢討當然合情合理；政府都申明無預設立場，應該唔會隨便取消「限奶令」。但廣男認為政府都必須先研究有關問題，喺確保供應充足嘅情況下，才考慮調整「限奶令」，一切都會以市民福祉為先。政府會唔會有啲措施確保到奶粉供應充足，廣男就不得而知，不過今朝聽電台聽到立法會議員劉國勳都話，就算實施咗「限奶令」之後，每年都仲有幾千宗違法帶奶粉過關嘅情況，人數無減少。廣男認為，如果「限奶令」取消，最開心嘅應該係新界西北區嘅藥房同埋水貨客，而目前種種跡象亦顯示，民情似乎都唔想撤銷「限奶令」，就連盲反派都唔想保留「限奶令」。

當年推出「限奶令」 殊不容易

當年本地奶粉之所以短缺，係源於內地人對內地所賣嘅奶粉質素有保留，水貨商、水貨客利用「螞蟻搬家」嘅形式，將本地奶粉運到內地售賣。當時未上任為行政長官嘅梁振英，已經表示會處理奶粉短缺問題，到佢上任喺2013年3月推出「限奶令」之前，坊間其實好大反彈；政界人士以至藥商大力反對「限奶令」，有人仲搬出「自由貿易」嘅盾牌反對「限奶令」，但梁振英政府抱住迎難而上嘅決心推出「限奶令」，今日我哋先可以唔駛「撲奶粉」。今日，現屆政府提出要檢討「限奶令」，廣男就覺得倘若要調整「限奶令」，前提係一定要先確保到全港各地尤其係新界西北地區有土地供應，否則全城「奶粉荒」隨時捲土重來，不可輕率行事。

原圖：stheadline