盲反派日前舉行所謂「反威權大遊行」，期間「違法佔領」發起人朱耀明等人有份成立嘅「守護公義基金」（下稱「基金」）喺遊行地點沿途擺街站籌款，聲稱要為被DQ嘅四名前議員同九個被控「公眾妨擾罪」嘅「佔中」主事者籌款。呢個「守護公義基金」非常可疑，一時又話為四名前議員籌錢，一時又話為「佔領三人組」等人籌錢，龍門搬來又搬去，到底籌到筆錢最終去咗邊架？

「基金」最初稱為被DQ議員籌款

所謂嘅「守議公義基金」喺舊年12月成立，當時「基金」發起人陳健民、朱耀明等表明希望透過一連串嘅籌款行動，為四名被DQ嘅前議員籌募至少500萬元，當時陳健民仲聲稱「用公民力量守護公義、對抗DQ」；不過，幾個月之後，「基金」就無喇喇變埋幫九個被控「公眾妨擾」嘅「佔中」主事者籌款。

發展到今日，「基金」已經變成既為四名被DQ嘅前議員籌款，又為「佔中」案九名被告籌款。個「基金」咁玩法，係咁「搬龍門」，其實籌咗啲錢係點用，一啲都唔透明，叫完市民捐款然後又「改變用途」，究竟邊句真？

倘若為公義 「佔中」主事者又何須籌款？

當「基金」將籌款用途「增加」為支援九名「佔中」案被告，廣男真係覺得好奇怪，呢班「佔中」主事者當初唔係話「公民抗命」要認罪、不抗辯繼而承擔罪責咩？而家佢哋籌錢打官司，係咪要為「走數」、逃避罪責做好準備呢？「守護公義」嘅最好回應，唔係應該喺法庭上認罪，以體現犯罪應該承擔罪責，抗爭都要「找數」嘅公義先啱咩？

佔中數簿未公開 新數免問

順帶一提，戴耀廷等人曾經承諾會交代「違法佔領」嘅帳目，但佢哋好似直到呢一刻，都就快上庭啦，都仲未公開個數簿，到底「佔中」果時啲錢用咗去邊，仲有冇剩？如果啲錢仲有剩，戴耀廷佢哋會唔會靜靜雞收埋啲錢，瞞住公眾將啲錢用作其他用途？所謂舊數未清，新數免問，戴耀廷應該盡快向公眾交待，唔好喺度側側膞！

原圖：stheadline