港大學生會前會長馮敬恩同前外務副會長李峰琦，因為衝擊校委會被法庭判罰社會服務令，本來案件嘅嚴重程度足以令二人坐監，不過法庭乃念佢哋有悔意，感化官報告較正面，所以從輕發落。其實見到有師兄因為犯法而被法庭判罪，正常人都會引以為戒啦，偏偏港大學生會現任會長黃政鍀唔似冇覺悟不特止，仲講到今次事件係校方嘅錯，而忽略有人犯法嘅事實。呢種「犯法有理，報警有錯」嘅想法真係好危險，廣男好擔心黃政鍀咁睇件案，會唔會自己都有日玩出火，燒親自己架？

違法有理 執法有錯？

黃政鍀今朝接受電台訪問，話自己對馮、李二人獲得輕判無咩特別感覺，因為成件事因校委會而起，到而家大學校委會仍然都未改革，同埋校方仲係堅持當時報警無錯；黃政鍀之後仲講到公眾「錯焦」咁，話衝擊校委會案件發生之後，焦點由校委會改革去左馮、李等人衝擊行為度。黃政鍀唔好玩啦，一個學校委員會嘅事，突然間變咗單刑事案件，公眾梗係聚焦喺涉案者身上啦，況且果時校委會都講好會成立專責小組研究大學管治，馮敬恩疑似誤導仲要帶埋其他學生去衝校委會，想焦點唔變都唔得喇！

廣男就覺得，黃政鍀呢一種「我冇錯」、「千錯萬錯都係政府錯、學校錯」嘅觀點其實好危險，就好似「雙學三人」案、「反新界東北衝擊立法會」案啲被告話政府錯、政治打壓等等一樣，明明事實係自己犯法，但掉番轉頭諉過於受損害一方甚至係執法部門，如果將呢班人嘅諗法「推廣」出去，佢哋係咪只要有政治理由，就可以為所欲為，甚至不惜傷害他人、破壞社會秩序先？廣男諗下都覺得恐怖。

黃政鍀思想乖戾 早晚出事

其實對於黃政鍀呢個人，廣男一直都對佢處事態度不敢恭維架喇，之前喺媒體節目為咗撐「港獨」竟然連「中國係幻想出嚟」等說話都講得出口；經過馮敬恩一案之後，仍然覺得違法抗爭係冇問題，廣男擔心佢越走越激，激過馮敬恩。其實馮敬恩都承認用錯表達方法，希望黃政鍀呢班激進學生代表都係懸崖勒馬喇！

原圖：RTHK