「學壞容易、學好難」真係好啱，呢排啲所謂學生領袖包括大學學生會會長個個都語不驚人誓不休。日前中大學生會會長區子灝喺開學禮就話一班違法者做緊「正確嘅事」，接受訪問時又話自己照舊會做激進行動等，會繼續參加暴力抗爭，預咗被拉喎，咁區同學唔知幾時會「求仁得仁」，然後又打「政治犯」牌呢？

又打「政治犯」牌？

區子灝同黃政鍀等盲反派人士一樣，基本上係完全刻意忽略「雙學三人案」或者「反新界東北衝擊立法會案」各被告嘅暴力衝擊行為。有人因為衝擊而受傷唔提、因為衝擊而有公家財物損失唔講、因為衝擊而影響社會秩序唔理，只係過度簡化到接近扭曲咁強調，所有被告都係「政治犯」；明明用暴力令人受傷，當做公民抗命，之後唔認罪唔找數又當係公民抗命，真係九唔搭八。

「違法達義」有代價

講真吖，喺呢個年代，大學生唔識嘢真係唔緊要，但唔該唔好自以為是囉。今日有報章報道，英格蘭同威爾斯地區前刑事檢控專員Ken Macdonald都忍唔住指出，如果類似「雙學三人」嘅事發生喺英國，英國上訴庭都好可能改判監禁，佢仲質香港部份盲反派係咪「只有判決合乎心意」嘅時候先會支持法治添。

反觀今日香港一班學生領袖，個個都以「政治」為由去合理化一班暴力犯嘅違法行為，Ken Macdonald嘅評論，可以話係一巴又一巴咁摑落呢班所謂學生領袖塊面度。大學生，醒醒啦，到底你哋畀人呃夠未呀，清醒少少睇吓乜叫做「法治」啦，拜託！

利用學生會作宣傳盲反平台

一眾大學學生會會長向新生灌輸「犯法係正確」嘅危險概念，廣男無能為力，亦冇權阻止，只係希望所有年輕人諗清諗楚，法治、法律唔會因為有人攞住支「政治旗幟」而違法就網開一面。好似區子灝咁，佢尋日話到明會繼續參加暴力抗爭行動，敬告呢位會長，千萬唔好好似雙學三人咁，到時畀人檢控，就大嗌政治檢控，試圖用政治壓力迫律政司「放生」佢，你唔係政治犯、更加唔係良心犯，喺香港暴力抗爭，只係暴力罪犯咋！

原圖：rthk