戴耀廷又出口術
戴耀廷又出口術

「雙學三人」、反新界東北案被告被判入獄,盲反派不斷將兩單法庭Case「演繹」成為「政治打壓」,其中「違法佔領」發起人戴耀廷相當戮力,一方面推卸散播「違法達義」嘅責任,另一邊又寫咗幾篇關於「威權統治」嘅文章,話法庭配合「威權政府」,講到行政、司法「兩權合作」咁款;到今日,戴耀廷又係報章發表「鴻文」,今次除咗講「違法達義」之外,仲意有所指話當權者(相信係指「法庭」)用最大力度打壓「違法達義」。屢屢出手詆毀法庭,讀法律、教法律嘅戴耀廷到底想點呢?


欲向法庭施壓?

身為法律學者,戴耀廷應該好清楚香港嘅法庭只係根據罪行嚴重性、被告悔意等作出適當判決,一切都係彰顯法治嘅表現,但佢偏偏一而再、再而三咁出術抹黑法庭甚至整個香港嘅司法制度,一定有啲古怪!廣男認為,戴耀廷咁做可能有兩個目的:第一,就係透過出口術向法庭「施壓」,大家唔好忘記,戴耀廷而家係有控罪喺身嘅,佢極有可能係想自己上法庭之時,搏法庭為咗唔想被指同政府「合作」而輕判佢(就算真係咁,佢喺香港都一定唔會成功!)。

自詡「政治犯」 為從政鋪路?

第二個可能,就係佢預見到自己會入獄,所以透過寫文章將自己塑造成「政治犯」、「良心犯」,預早搶佔道德高地,甚至係自己將來投入界政鋪路。戴耀廷自己心知肚明,一旦罪成,唔單止要坐監,佢喺大學嘅教席幾乎一定凍過水,喺前景一片暗淡嘅情況下,戴耀廷先將自己塑造成為「政治犯」、「良心犯」,他日就算真係被判刑,都可以喺輿論上搶佔道德高地,方便自己之後從政,同埋繼續喺反對指點江山。

其實,戴耀廷身為法律學者,又係「違法佔領」被告,佢毫不避嫌咁抹黑香港法庭,會唔會構成「利益衝突」先?同埋佢用到「威權政府」嚟暗示政府同法庭嘅關係,其實有冇觸犯諸如《藐視法庭》等罪行呢?廣男真係好想邀請全香港所有法律界人士,公開評論戴耀廷呢啲「踩過界」行為囉。

原圖:ifengimg

評論