我承認，自己係刻意搵返羅冠聰、周永康同黃之鋒等人點樣睇「公民抗命，承擔罪責」呢樣嘢。廣男呢兩日心血來潮，特意翻睇上述幾個自稱、被稱為「政治犯」同「良心犯」嘅人以往嘅言論，到底佢哋係唔係一早話咗會「承擔罪責」？如果係的話，點解今日「求仁得仁」，點解又講到自己係畀人「政治打壓」呢？唔好講咁多，即刻回帶睇睇先。

黃之鋒會承擔道德法律責任？

先講最出位嗰個黃之鋒。據《明報》11月12日報道，黃之鋒認為喺「佔領」現場被捕先算得上完成整個公民抗命被捕過程，藉以「承擔道德法律責任」；佢仲同記者補充，如果清場時未有被捕，必然有自首行動。

睇到呢度，廣男已經唔係好明，當日明明話會「承擔道德同法律責任」，點解今日責任臨頭，黃之鋒又覺得係政治打壓、政治檢控呢？學大律師公會前主席石永泰話齋，黃之鋒成日叫嗰句口號：「公民抗命，無畏無懼」，當中所謂「無畏無懼」正正代表唔怕被檢控嘛，而家律政司依法檢控、依法覆核刑期、檢控罪名又合適，咁同「政治檢控」有咩關係呢？呢點真係點都唔明。

羅冠聰會接受最終刑責？

黃之鋒咁講啫，咁周永康同羅冠聰又點講呀？廣男得閒得滯，搵到香港專上學生聯會2014年11月一篇聲明，裡面提到，「抗爭的市民願意接受最終的刑責，因此是符合法治的精神，以爭取社會公義」。羅冠聰當時係學聯常委，份聲明內容，相信仍絕對認同，佢其後亦一度擔任學聯秘書長，對於「公民抗命」需要「接受最終的刑責」，理應唔會反對吖，咁點解今日可能係「最終的刑責」到來，又突然變成「政治檢控」，佢會成為「政治犯」、「良心犯」呢？傻的嗎？

周永康會對整個法律體系負責？

至於周永康就最得意，佢喺2014年接受電視節目《講清講楚》訪問時係咁講嘅：「完了整個公民抗命行動後，會去自首，去完成整個法治，對於整個法律體系係會負責。」問題又嚟喇，講明會自首、會「完成整個法治」，咁做乜今日被依法檢控，佢會成為「政治犯」、「良心犯」呢？都係嗰句，控罪合適，何來「政治檢控」先？


香港人，大家醒醒啦，唔好盲反派撻「政治犯」、「良心犯」等名詞出嚟，大家就當係真先得，事情嘅來龍去脈，尤其係當事人以往嘅言論，大家都好應該了解清楚先下判斷囉。話香港有「政治犯」、「良心犯」，除咗係對律政司嘅侮辱外，更加係對香港法院嘅天大侮辱，咁講絕對唔可以接受！

圖片來源：takungpao