「雙學三子」黃之鋒、羅冠聰同周永康喺2014年因為衝擊政府總部東翼前地，因只被判社會服務令或緩刑，經律政司提出刑期覆核，今日下午終被上訴庭加刑，判即時入獄6至8個月。黃之鋒一喺另一宗案件求情嘅時候，就直言有意參選立法會，如果被判刑超過三個月，佢嘅希望同夢想就會立刻粉碎。當一班政客，包括黃之鋒自己成日話犯法都係為理想嘅時候，大家其實有冇諗過，用違法方式表達訴求，最後反而可能令到理想破滅呢？

因違法而令夢想破滅

可能廣男咁講大家會覺得好陰謀論，但廣男見到黃之鋒自「反國教」之後越嚟越癲，有事冇事都走出嚟，甚至煽動學生衝擊政府總部，廣男覺得一定有政治目的。目的係咩？就係要不斷「做嘢」保持人氣，等自己夠21歲果時就可以選立法會。為咗可以參選，「未夠秤」（未滿21歲）嘅黃之鋒仲試過申請司法覆核，挑戰規定年滿21歲先可以參選立法會嘅法例，但法庭拒絕受理申請！黃之鋒對於做議員嘅「決心」，可謂路人皆見。

今次黃之鋒被判監6個月，根據法例，佢未來五年都唔可以參選立法會選舉，即係最快可能要到2024年立法會換屆選舉，佢先有得選（當然，中間有補選另計）。就當黃之鋒一切行為包括違法行為都係為理想，因為自己同一班政客所謂嘅「理想」，而斷送自己一直以嚟想參選嘅理想，事情唔係好諷刺咩？

青年應以黃之鋒入獄為鑑

近年香港社會比較多政治紛爭，甚至出現一股不斷煽動青年「違法達義」嘅歪風，廣男在此奉勸所有躁動嘅年輕人，要以今次黃之鋒、羅冠聰為鑑，千萬唔好因為被政客煽動，一時失去理智而作出違法行為，因為咁樣唔係追求「理想」，而係斷送理想！

就算唔講黃之鋒之後想選立法會呢個Case，大家如果第時想做專業人士、紀律部隊、入政府、出國讀書以至移民等，留咗案底都可能有影響。當班政客話你聽咁做係為咗崇高理想，係公民抗命嘅一種體現時，大家真係要問下好似戴耀廷呢啲人，咁你哋啲子女又有冇為「理想」出嚟抗命、違法呀？

今次黃之鋒等人被判刑，法庭再一次清晰地話畀公眾聽，香港社會絕對不會容忍暴力同過激行為。年青人有政治訴求、要表態大家當然可以理解，但係咪應該回歸理性，用和平方式表達訴求，還請大家三思、慎思。

原圖：學民思潮Facebook