林子健為反高鐵上演「大龍鳳」?
林子健為反高鐵上演「大龍鳳」?

民主黨成員林子健涉嫌誤導警方,被懷疑「自編自導自演」被擄走嘅故事。喺林子健事件上演之初,反對派都有人將事件拉埋「一地兩檢」嚟講,例如公民黨楊岳橋就以「尚未一地兩檢,預演跨境犯法」形容事件。廣男唔知林子健係唔係「作故仔」,同埋佢究竟有咩動機。不過,睇到林子健網上面嘅資料同影片,廣男肯定林子健本人極度反對高鐵,會唔會反高鐵反上腦而做出愚蠢行為呢?抑或別有內情呢?

林子健曾稱想自殺可搭高鐵

廣男見到林子健突然之間「爆紅」,忍唔住上網「谷歌Research」下有關林子健嘅資料,見到有一個林子健有份主持嘅網台節目叫《呻吟透視》,其中有一集相信係喺當年內地溫州動車事件後錄影嘅,當時林子健同另一位主持人係咁唱衰高鐵,仲話起高鐵係用嚟「洗黑錢」、「掠水」同「貪污」嘅,叫大家如果生無可戀(即係想自殺)可以去搭高鐵。見到呢條片,廣男就喺度諗,反對高鐵可以理解,但將高鐵抹黑到咁盡,係咪有咁嘅需要呢?

其實喺呢個由林子健主持、叫《呻吟透視》嘅節目,有好多集都有關於高鐵同埋香港市民點樣反高鐵嘅內容,當中包括「高高燢興,唱低高鐵」行動,同長毛梁國雄佢哋喺街用唱歌「唱衰」高鐵。林子健唔係反對高鐵咁簡單,而係對高鐵甚至內地嘅一切事物都抱有頗大仇恨,否則都唔會將高鐵形容到好似「殺人機器」咁啦!

相信警方已掌握一定證據

今次林子健事件仲未完全水落石出,林子健有冇、或者點解要誤導警方,暫時大家都好難知,不過有熟悉警方運作嘅政壇高人指出,警方今次咁高調拘捕林子健,仲要Call埋記者去影相,都頗肯定有確切證據,證明林子健講大話。就喺廣男執筆寫呢篇文章嘅時候,仲睇到新聞話有旺角街頭嘅閉路電視影到林子健曾經喺旺角搭小巴去西貢,斷估唔會係有人挾走林子健,仲要係挾林子健搭小巴入西貢嗎?

林子健呢單嘢由開頭個個拉落「一地兩檢」果度,係咁借勢插內地同高鐵,到今日輿論壓力落喺民主黨身上,到底林子健係咪想借呢單嘢幫反對派「隊冧」一地兩檢,暫時仲係好難講,不過睇林子健往績,大家都應該Feel到佢政治立場係點啦!

原圖:takungpao

評論