港九拯溺工會噚日發表聲明，指工會前主席郭紹傑因為喺領取工傷病假嘅時候，高調參與社會運動，違反公務員必須保持政治中立原則同誠信，又多次喺未獲工會理事會批准情況下接受訪問而違反指引，所以永久刪除佢工會會員資格。郭紹傑回應傳媒查詢時，就指工會被唔同政治立場嘅人「滲透」，質疑工會「赤化」；睇返工會所講種種行為，郭紹傑真係有做過喎，而家佢唔認自己做錯之餘，仲只識諉過於人，乜真係咁都得？

郭紹傑有違政治中立原則

公務員要恪守政治中立原則，其實係人所共知嘅事，郭紹傑嘅種種行徑，廣男覺得絕對唔止係違反政治中立原則咁簡單，而係佢身為公務員，竟公然參與違法行動，而且仲係「有工傷」、攞病假期間。綜合當時傳媒報道同網上消息，郭紹傑可以話係果時金鐘佔領區嘅「糾察」頭領，一個攞緊病假嘅公務員，可以咁高調參與違法行動，其實早早已經有人提出質疑，佢咁做有冇違反公務員守則。一個攞緊工傷嘅人，就算真係有醫生紙，到底係應該好好休息，等到自己快啲痊癒，定係應該周圍走甚至高度參與違法行動，甚至係疑似參與「勇武」抗爭，同人推推撞撞，答案唔使多講啦！

廣男作為一個當時喺港島區工作嘅80後，所謂「佔領」區喺正公司樓下，見過「勇武」嘅郭紹傑聲如洪鐘咁喺金鐘佔領區「指點江山」，話佢係攞緊工傷、病假，廣男真係唔係好信！之後睇新聞，仲見到壹傳媒創辦人黎智英喺佔領區畀人掟動物內臟嘅時候，郭紹傑仲好「勇武」咁幫黎智英捕捉施襲者，仲將對方壓喺地上用索帶索實。雖然郭紹傑聲稱自己「真工傷」，又話如果佢係「呃工傷」一早受法律制裁，但「工傷」得咁Fit，真係好難令人唔懷疑囉！

郭紹傑參與違法佔領應被追究

呢位聲稱係金鐘佔領區「糾察長」嘅郭紹傑，據報經常喺佔領區醉酒鬧市，仲要係飲醉酒「挑人機」果隻。一個公務員，應該係話一個因為工傷攞緊病假嘅公務員，高調參與違法事件，表現完全唔似有工傷地捉賊，仲要成日醉酒鬧事，廣男想講，郭紹傑有冇呃工傷，執法部門都好應該嚴正調查佢喺違法佔領嘅角色，有需要就要作出調查甚至拘捕！

對於工會嘅決定，郭紹傑仲質疑工會被赤化、藍絲化，廣男就認為，明明係郭紹傑自己做錯事先，被人處分就話畀人政治迫害，呢種態度真係非常唔公道，試問郭紹傑喺攞病假期間高調參與政治色彩極濃嘅違法行動，呢個係咪事實先？再者，如果個個都可以喺冇工會批准下出嚟對傳媒亂噏一通，咁工會仲邊有公信力呢？郭紹傑唔反省自己缺失，仲要掉番轉話工會被赤化，真係好符合反對派一有事就話係政治迫害嘅「盲反Style」囉！

圖片來源：頭條日報