黃之鋒屈人洗腦為自己翻身?
黃之鋒屈人洗腦為自己翻身?

香港眾志秘書長、前學民思潮召集人黃之鋒想DQ蔡若蓮,希望對方做唔成教育局副局長,幾乎係人盡皆知嘅事,好彩特區政府冇畀黃之鋒同班反對派要脅到,堅持頂住壓力委任學歷、資歷以至行政經驗皆一流嘅蔡若蓮做教育局副局長。正當以為事情告一段落嘅時候,廣男噚日睇報紙仲見到黃之鋒繼續寫文向蔡若蓮「發炮」,原本條題仲要係〈紅副局蔡若蓮為學校採用紅教材鋪路〉,之鋒哥哥喺外界都未知蔡若蓮喺教育局做乜嘅時候,佢就「預測」到人哋為染紅學校鋪路,唔通佢有超能力?

蔡若蓮推愛國教育又如何?

黃之鋒不斷攻擊蔡若蓮嘅一點,就係話蔡若蓮係愛國教育重要推手,因為佢曾經係教聯會副主席喎。廣男真係好想同黃之鋒斟酌下,佢點知道蔡若蓮喺教聯會做過啲咩呢?教聯會做嘅所有嘢,全部都關蔡若蓮事?話蔡若蓮係重要推手,但黃之鋒有冇實質憑證?更加重要嘅一點,就係蔡若蓮贊成或者有份推廣愛國教育,又有咩問題呢?難道作為中國人、香港人,叫人愛國係有問題嘅?定係要好似香港眾志咁,要推動變奏版「港獨」嘅自決主張先為之啱呢?

黃之鋒狂攻蔡若蓮 為自己造勢?

諗真啲,黃之鋒近期不斷攻擊蔡若蓮,其實作為一個政客嚟講係相當之聰明嘅;近年黃之鋒聲勢大不如前,自從反國教、違法佔領行動之後,理會黃之鋒嘅反對派支持者越來越少,好多時候感覺黃之鋒行出嚟仲好似唱緊獨腳戲咁。好喇,而家有個政治立場未必相近嘅教育工作者做教育局副局長,黃之鋒就可以乘機不斷抹黑人推洗腦教育,既可爭取到傳媒關注,又可以借「反國教」舊橋幫自己翻身,計落又點會有蝕底呢?話唔定仲為佢將來參加選舉鋪路添!

不過,社會風氣有變,可謂「此一時,彼一時」喇,以前啲市民覺得反對派講得有道理,就上街支持反對派,但近年好多市民覺得畀班反對派老點得多,仲聽你哋講然後又衝擊又違法?反對派應該睇下「狼來了」嘅故事,再諗下佢哋一而再、再而三咁煽動市民,畀你哋煽動得多,仲咁易信你哋,傻豬嚟架咩?

原圖:無綫電視截圖

評論