對網民嚟講，版權修訂條例明明係好嘢嚟，但竟然差唔多落得胎死腹中既下場，平時久唔久都鍾意搞下「惡搞」圖既囍雨，真係感到好悲哀囉。當然，最悲哀既係，香港從此睇嚟會正正式式淪為侵權之都，拜邊個所賜？咪就係班泛民政客囉！

鐵證如山！泛民阻撓版權法

當商務及經濟發展局局長蘇錦樑尋日為版權修訂條例草案設下底線，表明議案下星期唔能夠表決就「作罷」。之前一直瘋狂「拉布」既泛民講乜呀？泛民飯盒會召集人何秀蘭竟然話，泛民過去三個月用盡方法希望拉近距離，所以對於蘇錦樑局長既說法「表示遺憾」喎！嘩嘩嘩，真係擘大隻眼講大話，過去幾個月，泛民做咗乜呀？佢哋近乎「零出席」立法會既審議會議，咁都唔只，仲係咁「點人數」，點到唔只一次流會，浪費晒公帑。仲記唔記得早排版權大聯盟咪約見泛民議員既，泛民佢哋次次都只派小貓一兩隻去聽人講嘢。唔通上述呢啲行為都符合何秀蘭口中既「用盡方法希望拉近距離」？

資訊科技界果位尊貴嘅立法會議員莫乃光就仲妙，出席節目時大大聲聲話版權修訂條例落伍，應該更新條例保障各持分者既權益。吓？但你當日明明支持修訂，到咗後來怕咗激進網民就突然「轉軚」變咗反對，成個過程有晒證據，根本唔輪到你抵賴囉。

帶眼識人！認住法律界政棍

除咗何秀蘭、莫乃光，當然唔可以數漏泛民果堆法律界既政客，好似郭榮鏗、梁家傑、涂謹申、何俊仁咁，佢哋無視完善法律既使命，令香港既版權條例繼續落後，令原創人繼續得不到保障，難怪已退出公民黨既湯家驊都忍唔住發炮話：「誰叫我們選出這樣的政客？這是立法會的悲哀，也是整體社會的悲哀！下次選舉確實要帶眼識人」。

講到尾，既然網民唔肯接受豁免，堅持要面對刑責，咁咪以現有法例處理囉，佢哋會因為無任何豁免而令佢哋受刑事檢控既機會維持响高水平，呢啲事實，究竟泛民班議員有無同佢哋講清講楚？果啲網民組織，究竟又係咪真係為網民著想呢？呢啲問題，希望網民真係可以冷靜諗諗。

至於宏觀啲咁睇，當然就係不利本港創意工業發展，因為大部分投資者都不會想响版權保護不足既地方發展囉！

仲講創意之都？咪玩啦！响泛民政客既阻撓下，香港版權條例先至咁落後，創意之都九成九無運行，睇怕侵權之都呢個惡名，都離香港不遠矣！

原圖：知識版權署網頁