我上禮拜聽到最唔開心的消息，唔係高鐵超支幾多錢，而係教育局夠膽死公然廢咗教學語言政策，話英文水平唔達標的英文中學，可以由得佢乜都唔使做，學生入去，老師自自然然識用英文教，呢個咩教育局？有咩理由可以咁樣對學生，學生英文未掂入到哎呀英文班，堂堂發夢，雲遊太空，愈來愈無興趣返學、上堂。教育局無腰骨、無魄力、無膊頭，令到幾多學生無咗學習興趣。唔講理念、唔講規矩的教育局，憑咩掌管香港教育？

報章引述教育局宣布︰「現行教學語言微調政策定斷學校中一至中三開英文班的數目，班數主要視乎學生能力，若中一每班有八成五學生屬全港成績前列四成，就可成為英文班。

教育局完成微調教學語言後首個檢討，消息指，不達標而須一六學年落車的全開英文班學校達三十二所，佔全開英文班中學三分之一。」呢個係我聽過最無承擔、無稽的決策，2003年檢討中學教學語言及中一派位機制，一班真正對教育有心、有理念的人聚首，花18個月時間研究，經過200多場家長、教育界簡介會，嘔心瀝血，背脊受咗唔少箭，堅持提出一套真正為學生學語言的機制，希望學生「母語教學、學好英文」。直至前教育局長孫公就政治解決教育問題，美其名都叫微調，實質是放任學校亂用英文教，但總算有個譜；今日的局長，改個名包裝都廢事，直頭赤裸裸咁取消教學語言政策，因為唔敢得罪人，任得學校掛羊頭賣狗肉。

呢個教育局只講和諧唔講學生福祉，一切以和為貴，真正教育有心人自然心裡有數。中文中學聯會發聲明向教育局發炮，「倉卒修改教學語言微調政策，深表失望，新公布的教學語言政策與過去教育局所依據的學理背道而馳，有違專業；學生未能以適切語文學習，其利益必受損害」中中聯會講咗我心裡的話，我想再強調一次，所有教育政策，目標只有一個，就是對學生好，其他政治、學校利益、學校名譽、個人榮耀等等，都唔應該排在學生福祉之前，絕對唔能夠退半步。

睇完全篇，或者你會問做乜全篇都用廣東話來寫？因為只有母語才能講出我心中有幾火，對呢個教育局有幾失望。

原文轉載自《am730》2015年7月8日

原圖：takungpao