全世界大概只有香港買樓是這樣畸形，畸形現象很多，多得可以寫一本畸形實錄。

最近長實賣樓又有新猷：你睇樓就唔賣樓畀你，唔睇樓嗰啲至有得買。

咩世界？

如果不是銷售監管局嚴辭批評，大概沒多少人知道，大埔新樓盤「嵐山」的買家必須簽署「無參觀同意書」，才能買樓。

你要買樓，條件是不准睇樓，幾百萬甚至幾千萬的生意，買家不得看現貨，當中弔詭，怎說我都想不通。

你買個西瓜，也會摸摸、敲敲，拿多幾個來比較。可是今日我們買物業，卻兒戲得可怕。上年我區有幢商場重建，剛執笠圍封了的舊物業，翌日已擺滿地產檔口在推銷。我帶女兒路過，推銷員送她們一人一球棉花糖，還拉她們去售樓處那邊，說多送幾包爆谷，主要當然是慫恿我這個阿媽同行。我趕忙逃竄，因為我不想為了一包爆谷丟失幾百萬積蓄。

還有一回，我在該裝修中的商場附近等小巴，人龍很長，因為車未到，幾乎每個排隊的人都成了地產經紀的游說目標：「二百萬一間舖，邊度搵？十零萬入場費，入伙轉手即賺……」

我舉起手上瓜菜說： 「我出來是買菜的，我說服唔到自己，何解買買吓餸忽然買間舖返去囉？」

我一直奇怪，為什麼賣舖賣樓要在街上拉客，有心買自然會來啦，何必要經紀日曬雨淋找街客？幾百萬的生意，可以在街上拉回來，有冇咁大隻蛤乸隨街跳呀？最近終於明白，原來沒準備的街客，才最易「落疊」。當你沒打算、沒準備，人家就可以攻其不備。

即使你做足工夫，買方也一樣有贏你的方法，譬如塞你厚厚的售樓書，然後告訴你，這是「最後一間」，有買趁手，於是，慌亂中，你簽了一大疊文件，回到家，慢慢揭開售樓書才發現，原來屋前有個墳，原來還簽了張「不睇樓確認書」，真是喊都無謂。

原文轉載自《明報》2014年7月20日

原圖：網絡圖片