黎智英案今日（12日）踏入第59日審訊，控方傳召第五名「從犯證人」、法律助理陳梓華出庭作供。陳梓華供稱，當初為解決G20登報計劃資金問題，透過李柱銘聯絡黎智英。而在「G20全球登報計劃」中，黎智英及Mark Simon最終墊支了共約150萬元，Mark Simon還曾承諾在《蘋果日報》旗下報社登廣告時可以先刊登、後付款。
陳梓華今日出庭時，身穿灰色西裝、白色裇衫，蓄黑色短髮及戴上金屬幼框眼鏡。他供稱自己學歷為中國法律碩士，另持法律學士學位，由2018年起在律師樓任職法律助理。陳梓華確認自己於2020年10月10日首度因串謀協助逃犯罪被捕、後獲警方保釋，至2021年2月15日再因勾結外國或境外勢力危害國家安全罪被捕。
及至2021年7月7日，他承認串謀外國勢力危害國家安全罪，該罪指他在2020年7月1日至2021年2月15日串謀黎智英、Mark Simon、李宇軒及劉祖廸請求外國對香港、澳門及中國實施制裁或封鎖等。
陳梓華供稱「我認識黎智英係喺2019年6月透過李柱銘先生去聯絡到佢」，指因為「當時我喺Telegram G20公海群組，我見到一個用戶個名叫RIP，佢話當時佢哋需要資金去作全球登報文宣」。他續稱看見對方要求後，先聯絡RIP，並問到需要資金的原因，「佢解釋雖然眾籌資金已達咗標，但係佢攞唔到嗰筆資金」；陳梓華亦指RIP當時直接Telegram打電話聯絡他，而他聽到對方是男性聲線。
陳梓華解釋，Telegram（簡稱：TG）公海是任何人都可以隨意進出的群組，其群組名稱為「G20公海群組」，他起初的TG用戶口為「@蜂蜜T奶」，而當年群組成員正在策劃一個國際登報活動或全球登報計劃，「趁當時喺G20峰會，希望可以表達當時反修例運動，同埋關注香港情況，當時亦希望表達到暫緩逃犯修訂條例等於撤回」。
陳梓華憶述「G20公海群組」內人數過千或過萬，有一名用戶名為「Uncle Walkie」的人令他印象深刻，因為當時大家都想不到有什麼途徑去處理拿不到眾籌資金去登報的問題，「Uncle Walkie」便提議他們或者可以聯絡黎智英或其朋友以解決問題。
陳梓華當時便在TG群組問：「咁有冇人識黎智英？」，然後有人提議「如果冇人識黎智英，或者可以聯絡李柱銘，因為眾所周知，佢哋兩個關係好好」。陳憶述當時群組「有人畀咗李柱銘個電話出嚟」，但陳質疑「嗰個人搞笑」，陳解釋：「因為個電話號碼好特別，有六個字一模一樣」，陳大膽致電後成功聯絡到李柱銘。
陳在電話中表明：「我好冒昧唐突咁打擾你，但係有一個G20全球文宣登報計劃，宗旨係想喺G20表達香港人訴求，但因為眾籌計劃程序上不能直接取得資金」，所以沒有辦法「畀錢報章hold住版位」，故需要一筆約港幣300萬元的Bridge Loan （又稱：過渡性貸款、過橋貸款），「一定會還」，「想睇吓李柱銘可唔可以幫手聯絡黎智英」。
李柱銘稍後回電陳梓華問清楚為何他需要貸款，因為按李柱銘的理解，眾籌已達標，但陳梓華解釋眾籌平台GoGetFund「hold住筆錢」，令他們未能馬上取得眾籌資金。李柱銘表示明白情況，亦會就此事聯絡黎智英。
李柱銘聯絡黎智英後致電陳梓華，表明「黎智英已經知道呢件事」，但黎智英不在香港，故叫陳梓華聯絡黎智英助手Mark Simon，便可直接與Mark Simon對話。陳認為「初步聽落去黎智英係ok呢件事」，李柱銘便傳送Mark Simon的電話號碼予陳梓華。
陳梓華續指「咁我就打畀Mark Simon」，「我將我哋遇到嘅困難講畀佢聽，然後話我地需要呢個bridge loan去完成G20之前登報嘅報紙」，「佢（Mark Simon）話佢大概知道呢件事，我唔係第一個聯絡佢嘅人，但因為我講得比較清晰，所以佢願意同我合作」，Mark Simon當時亦表示「呢個計劃符合佢哋嘅政治主張，佢哋都希望通過呢個行動，可以令政府回應巿民嘅訴求」，「然後佢話佢哋會同佢老細聯絡」。
陳梓華指初時沒有向Mark Simon提出需要的金額，但約10至15分鐘後「佢打返電話畀我」、「佢話呢個bridge loan無問題，佢願意墊支500萬，但係要還」。陳梓華稱「當時佢同我講個budget（預算）係500萬，不能多於500萬」。
控方問到，Mark Simon有否提及他的老闆。陳梓華稱「當時佢話Jimmy會願意提供all kind of help（任何形式的幫助）去支持呢類型嘅文宣活動」，Mark Simon當時又指「呢一筆錢唔可能經我地任何人手」，「佢希望個方式係當啲報章出個invoice嘅時候」、「佢哋直接付款畀個啲報章」。陳梓華又稱「我嘅理解，Jimmy係黎智英」。陳梓華指當時Mark Simon亦表示「如果係蘋果旗下報章登報紙，係可以先登報、後付款」。
陳梓華續稱，他與Mark Simon通完電話後，他在Telegram致電RIP，「我當時同佢講，蘋果黎智英個邊願意墊支500萬，而個做法係將啲單寄過嚟，畀佢哋找數」，「佢（RIP）當時唔信，佢一開始唔相信呢件事，然後我再同佢講，我好確定係可以做到」、「國際線上面，需要幫忙嘅話，我可以聯絡黎智英或者Mark Simon」，「佢（RIP）當時好興奮，話要搞咗啲報紙先」，便開始處理「喺邊個國家地區」登報的事情。
陳梓華解釋，他當時會聯絡RIP，是因為當時G20「公海」群組有置頂訊息，因為置頂訊息需要權限，「我當時相信RIP就係呢個群嘅群主」，加上他早前已聯絡過RIP及相信他負責登報計劃的財政事宜，所以便聯絡RIP。陳梓華又指，他當時不知道RIP真實身份，直到7月左右，他得悉RIP即李宇軒。
陳梓華確認G20國際登報計劃在2019年6月25至29日確實曾經實行，他聯絡Mark Simon借取最多港幣500萬元的過渡性貸款，後來只幫忙協調登報單據、收據、發票等事宜，沒有參與廣告排版及編寫廣告內容等工作。
陳梓華指李宇軒當時收到不同報章的發票後，以電郵方式傳送給陳梓華，陳梓華把發票從電郵及WhatsApp方式傳給Mark Simon，Mark Simon找數後把收據傳送給陳梓華，陳梓華再把收據轉發予李宇軒。
陳梓華記得報章發票包括英國《衛報》(The Guardian)、美國《華盛頓郵報》 (The Washington Post)、兩份法國報章、一份意大利報章。
控方問及有些報章發票沒有傳電郵予Mark Simon，該些登報費是如何找數，陳梓華指一般是李宇軒收到報章發票後，李宇軒墊支支付，而以陳梓華所知，李宇軒從香港連登討論區得悉G20全球登報計劃，李宇軒參與眾籌計劃時，負責揀選眾籌平台並把收款人設定為李宇軒，陳梓華亦曾確認該些報章的登報費是由李宇軒找數，「所以佢（李宇軒）除咗係funder（出資者），其實都係collaborator（協辦人），去將不同報章內容最尾擺埋一齊」。
控方向陳梓華展示《華盛頓郵報》的發票，發出日期為2019年6月28日，金額為85050元美金，並註明廣告客戶為李宇軒。陳梓華供稱該發票由李宇軒給他，「我將呢個invoice轉發畀Mark Simon」及表示「我哋要找數」，「然後Mark Simon就按照我哋之前講咁樣，佢就去找數」，其後Mark Simon有把收據發送到陳梓華的電郵地址「thisiswah@hotmail.com」。
控方又展示由《華盛頓郵報》一個名為「Terrie Lam」的人發給陳梓華的電郵，當中附有「Meridian wire transfer receipt」。陳梓華確認該收據的金額為85,050元美金，而付款人為Lais Hotel Properties Limited，收款人為《華盛頓郵報》。該電郵亦寫到「This was the payment slip received from Mark's end.（這是Mark那邊的付款紀錄）」，陳梓華稱Mark即Mark Simon，Terrie Lam亦知道Mark Simon那方會墊支費用。
控方續展示英國《衛報》2019年6月27日發出的發票，顯示須在2019年6月28日支付18,000英鎊。陳梓華稱該發票由李宇軒電郵給他。
陳梓華亦確認《衛報》的相應「Meridian wire transfer receipt」上，寫有「payment on behave of Mr. Li Yu Hin」，而付款人為Lais Hotel Properties Limited。
控方另向陳梓華展示法國《世界報（Le Monde）》的發票，以及相應「Meridian wire transfer receipt」。陳梓華確認金額為2.6萬歐羅，而前者由李宇軒電郵給他，後者則由Mark Simon電郵給他，他亦有將Meridian收據轉交給李宇軒。
控方展示《巴黎人報》(Le Parisien)的登報費收據，列明登報費為$1.8萬歐羅，但Mark Simon找數的單據則顯示$2.16萬歐羅，陳梓華指李宇軒後來發現「啲數唔啱」，並在單據手寫上overpaid（多付）一字。
控方提到在「G20全球登報計劃」中，陳梓華從Mark Simon收到一些廣告費的收據，付款人分別為Lais Hotel Properties Limited或力高顧問有限公司，當時Mark Simon有否透露上述兩間公司的事情。陳梓華表示沒有，但後來他在7月首次與Mark Simon見面時，Mark Simon有向他透露。
陳梓華另供稱，他有將相關的轉帳紀錄轉交給李宇軒，因為「當時佢話佢需要作記錄」及有報館須轉帳紀錄作為付款證明；陳梓華又提到，他首次與李宇軒親身見面是在同年7月，他在金鐘太古廣場要求李宇軒簽借貸協議。
控方向陳梓華展示一封日期為2019年6月26日的電郵，顯示由「thisiswah@hotmail.com」發給「msimon@nma.com.tw」，內容為「Hi Mark, Please help me out with this.（你好Mark，請幫我處理這個）」。陳梓華確認「thisiswah@hotmail.com」是他的電郵地址，而「msimon@nma.com.tw」是Mark Simon電郵地址。
控方亦向陳梓華展示，台灣《蘋果日報》的發票，顯示廣告客戶為李宇軒，金額為120萬新台幣，刊登日期為2019年6月28日，付款日期則寫着「刊前付現」。陳梓華確認發票。
陳梓華供稱，當時他與Mark Simon講電話時，Mark Simon表示「能夠幫手係蘋果旗下報刊，先行刊登左（廣告），然後再付款，但係當時李宇軒收到呢張單（台灣蘋果日報發票）嘅時候，發現唔係可以先行刊登再付款」，「所以我send畀Mark Simon」及另外WhatsApp致電給Mark Simon，Mark Simon後來回覆「處理咗」，陳梓華便通知李宇軒。
另外，在一連串電郵中亦有「e.pigeon@hotmail.com」，陳梓華指該電郵亦是屬於他。
陳梓華提到當G20全球登報計劃已成功在13個國家、20份報紙登報，李宇軒亦已收到眾籌資金，李宇軒一度「唔應機」，陳梓華認為應簽訂借據（IOU），「無論對Mark Simon、黎智英定G20本身都係負責任的做法」。
當陳梓華打數次電話後李宇軒終於接電話，陳梓華向李宇軒解釋情況，指Mark Simon稱有人問他「筆錢幾時番嚟？有冇時間表？」。
陳梓華憶述他約在2019年6月25至29日，曾在金鐘太古廣場巴士站與李宇軒首次見面，他解釋當時「純粹見個面，順便問佢點解要自己墊支筆錢，因為據我所知佢差唔多要墊支400萬港元，然後黎智英墊支差唔多200萬港元，夾埋600萬港元的話就係佢差唔多可以攞眾籌筆錢」。
陳梓華指當時李宇軒回答：「為咗香港都一定要咁做，就算按咗層樓，都要咁做」，而陳梓華當時也不知道李宇軒的名字，只知李宇軒是TG用戶RIP。
陳梓華與李宇軒第二次見面是在2019年7月，兩人相約在金鐘力寶中心見面並簽署借據，控方問陳梓華有否留意李宇軒知道要簽借據時反應如何，陳梓華稱他當時沒有太留意李宇軒的反應，只想首要處理好簽署借據一事。陳梓華代表Mark Simon簽署借據，立約方為陳梓華與李宇軒，借據金額約150萬港元，當時有兩名見證人在場，陳梓華指兩名見證人也是網友，分別是男會計師及一名有金融背景的人士，雙方簽署借據後沒有商量其他事情或如何還錢。
陳梓華指李宇軒在2019年7月表示不知道應轉帳至香港、台灣、加拿大哪一個戶口，令他未能完成還款，陳梓華指Mark Simon只提及三個戶口持有人「都係佢老細（黎智英），但無講過持有人係邊個」。陳梓華曾向Mark Simon表示李宇軒願意個人承擔債務，所以「不會拖筆數」，只是李不知道要轉帳至哪一個戶口，「未知要一次過俾定分開俾」。
陳梓華隨後以Telegram致電李宇軒，覆述Mark Simon的說話，李宇軒「隔幾日已經找咗筆數」。
陳梓華供稱他與Mark Simon首次親身見面，是在2019年7月的中環文華東方酒店，「我入去Café（咖啡廳）嘅時候，好快就揾到Mark Simon」，Mark Simon向他招手，待他坐下後，Mark Simon透露「佢係黎智英助手，基本上就執行佢boss（老闆）嘅order（指示）」。
陳梓華供稱Mark Simon「大讚G20全球登報文宣」、「非常滿意個成果同埋效果」，「佢認為未來嘅文宣方向應該係延續番G20登報嘅影響力，佢畀左個例子『展覽』」，Mark Simon指「並唔係人人都會睇報紙」、「我地可以係呢方面繼續做多啲，亦都符合佢地嘅政治理念」、「佢地願意提供經濟上、人脈上……同埋媒傳方面嘅協助」。
控方問到Mark Simon有沒有解釋其政治理念。陳梓華稱沒有，但當時「有幾次強調民主」，然後Mark Simon便給了他一個公文袋，內有收據及銀行資料等，但當時Mark Simon沒有提到須何時還款。
Mark Simon得知陳欲轉行從商 表示可助開立離岸公司戶口
陳梓華續稱，「佢（Mark Simon）問我未來想做啲乜野」，「當時我同佢講，我有個朋友摟我做生意，其實我鍾意做生意多啲」，「然後佢同我講話係咪遇到咩困難」。陳梓華稱當時向Mark Simon表示在香港難以開立離岸公司戶口，Mark Simon則指「佢可以幫到我」、「你就當係一個獎勵畀自己」，但Mark Simon當時「無講清楚」。
陳梓華指「佢亦都問過我係咪會繼續參與係文宣工作入面，然後我話我會繼續」，當時Mark Simon所指的文宣「分別有本地一啲文宣工作，亦都有講緊係國際上面lobbying（游說）」。控方問到就什麼進行游說。陳梓華稱「五大訴求」。
控方又問到「G20全球登報計劃」後，有沒有其他行動。陳梓華稱「有，但唔係同一班人」，而是「JD Team」、即「攬炒團隊」，當時在網上論壇和Telegram群組有很多人表示「攬炒團隊」準備眾籌登報，但主題與「G20全球登報計劃」不同，「我地當時主題係反修例同五大訴求」、「但JD Team主旨係中英聯合聲明，希望英國政府可以履行佢道德責任」。
陳梓華於TG不同群組招募相同想法人士加入「公海群組」
陳梓華另解釋，當時他們會在Telegram開設「公海群組」，然後把大量用戶「拉入」，及不斷在其他群組散播「公海群組」連結，吸引注意力及招募相同想法的人士，然後再問有沒有人想參與特定項目，例如在「G20全球登報計劃」中便涉及很多不同語言的報章，他們便開了不同的「Sub-group」，分別處理不同報章後，再交給李宇軒及其他活躍的管理員「去做最後確認」。陳梓華亦確認「Sub-group」不會是公開群組。
陳梓華指他沒有參與「攬炒團隊」的「英國登報計劃」，也不知道「攬炒團隊」有沒有TG群組，但知道「攬炒團隊」是由在香港連登討論區成名的「攬炒巴」劉祖廸帶領。陳得知「攬炒團隊」需要人幫手做眾籌，陳當時理解為「攬炒團隊」又需要有人墊支。陳便向李宇軒說：「你去做啦」，因為陳認為李宇軒已有足夠能力做好所有眾籌工作，而且陳當時相信「攬炒團隊」需要一個有眾籌經驗的人，陳下一次再與李宇軒對話時，發現李宇軒已在「攬炒團隊」做事，開始籌備「英國登報計劃」。
圖片來源：港人講地
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論