//文念志嘅例子話俾大家知，坐監唔會令你人生更精彩。//

花生價格指數又急升喇！因非法集結等罪，俾法庭判坐監３個月嘅攬炒派議員，大埔前區議員文念志放監喇，佢因為坐監前辭咗區議員一職，已經冇咗份幾萬蚊嘅工，返出嚟會做乜呢？噚日佢就喺Facebook披露去向，從操故業做番紮鐵工人，話「做隻專心搵錢嘅港豬」咁話，又話日後終於唔使怕精神上攰，因為「肉體更攰」。
 
文念志喺篇帖文度，表面上好似幾積極嘅，嘩！嘩！嘩！講到好爸閉，話要「以不屈不撓既精神去生活同工作」。不過，全文最精彩嘅係，提到其他辭職或被DQ嘅攬炒派議員，人人都有不同嘅發展，有啲人在外地，有啲搞小生意，有啲做番以前正職，而佢呢………「我只係用最污糟嘅手賺最乾淨嘅錢」。隔住個電腦屏幕，都聞到陣陣酸味啦！咁又難怪既，一班「手足」原本講好咗齊上齊落，點不知而家得番自己一個拎住支鐵，你話係咪嬲嬲豬呀？

試過鐵窗風味嘅佢，今時今日拎番支鐵，相信心頭都好有滋味。不過紥鐵話晒都係建設社會，點都好過搞破壞。有網民話，做地盤都可以貢獻社會，唔好做黑議員破壞社會，算唔算改邪歸正？又有網民講做紮鐵好，起碼「實實在在」工作，不是搞「暴亂」，壞腦筋，可以的話，就介紹埋鄺俊宇，他負擔大要供豪宅。

文念志其實仲有單案在身，涉嫌阻差辦公，如果入罪，想拎番枝鐵做紥鐵都係咁先囉！不過，話時話，天有眼嘅，搞亂香港破壞法治，當然要付出代價啦！

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk