//李永達「著草」得咁鬼祟，難怪連自己友都唔撐！民主黨今次又鬧出大笑話，真係𤓓爆！//


咩叫本是同林鳥，大難臨頭各自飛？之唔係講緊有白鴿黨之稱嘅民主黨囉！話說，繼前黨友許智峯畏罪潛逃後，民主黨副主席兼創黨成員李永達日前被網民揭發，「鬼鬼祟祟」現身喺機場，搭夜機「著草」去倫敦。最抵死係，身為黨主席嘅羅健熙話咩咩咩冇收到佢辭職，前主席劉慧卿仲話上星期先食完飯，對方「乜都冇講」喎。

哇哇哇，兩位急急同佢割席喎，李永達仲係咪你哋黨友先？係真唔知定假唔知呀？不過，有黨員就唔多Buy李永達「著草」，同傳媒呻：「早兩日仲叫大家堅持做地區，唔好選」，連身為民主黨中委嘅「乳鴿」蘇逸恒都公開出Post，寸有人「叫人衝，自己鬆」。

睇返李永達今年6月當選民主黨副主席時，仲好大口氣話自己第一個工作，係穩住軍心。嗱嗱嗱，依家軍心未穩，主帥先逃，咁冇交帶、又冇擔當同骨氣，做咩政治人物？昔日所謂「兄弟爬山 各自努力」，到頭來係「田雞過河 各有各撐」，呢啲唔通就係「精人出走，笨人出手」呢？李永達點對得住一班俾你呃出嚟衝完之後被判入獄嘅手足呀

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk