//泛民區議員唔理民生整日玩政治，需要宣誓效忠時又個個辭職跳船，咁樣冇責任心真係幫市民咩？//

喺香港，邊啲公職人員最不務正業？泛民區議員認第二，相信冇人認第一囉。是咁的，因為疫情原因，警方反對支聯會今年喺維園舉行六四燭光晚會。嘩嘩嘩，咁大場政治騷無得搞，泛民區議員為咗繼續喺鎂光燈下博曝光，民主黨主席羅健熙仲日光日白攞住白蠟燭周街派添﹗原來左度右度度到呢幾招谷氣氛：po帖文啦、喺議員辦事處點蠟燭啦、擺街站派蠟燭啦，點知被市民投訴。民政事務總署於是向約30個區議員發警告信，提醒佢哋進行「與區議會工作無關，影響地區和諧，可能觸犯法例」，仲隨時不獲發還開支添。

嗱嗱嗱，呢班泛民區議員梗係第一時間搬出一推擋箭牌啦﹗西貢區議員陳嘉琳就po出民政署人員到議辦視察嘅相，好巴閉咁話：「本人係民選議員」、「我唔會驚嘅」。早前話提供電子蠟燭叫市民喺屋企「熄燈一小時」嘅荃灣區區議員林錫添，收到署方嘅信後腳仔軟，宣布活動臨時取消，仲夾硬解釋自己係為咗「推廣環保，減低碳排放」喎。

自從泛民區議員騎劫區議會之後，搞風搞雨冇停過。成日唔理民生玩政治，需要宣誓效忠時又一個二個輪住辭職跳船。今次相關部門只係揸正嚟做，唔使咁大驚小怪喎，如果你哋無犯法、無亂揈公帑又使乜驚呢？咁冇責任心，點對得住市民呀？

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk