立法會幾位激進派議員近日「拉布」，拉到議會亂晒籠！喺《撥款條例》草案拉布，令政府部門陷入財政懸崖都唔夠，再喺財委會新界東北前期發展工程撥款「拉布」，仲連工務小組既「一堆一爐」都「拉」。唔鍾意又「拉」，唔想傾又「拉」，為左一己既慾望，「拉布」議員可以去到幾盡？

將心比己，如果立法會檢討緊佢哋人工既時間，有人「拉布」，佢哋會點呢？呢班人美其名就係為基層，其實係害基層先真！有議員估計，拉布一日就會損失250幾萬，夠買幾十萬罐罐頭畀啲基層，或者夠社會服務機構營運一年半載。「拉布」仲分分鐘搞到施政報告入面好多新加既扶貧措施上唔到馬，好似資助27萬清貧中小學生午膳、書簿同學習開支既津貼、惠及71萬人既「低收入在職家庭津貼」、仲有綜援出雙糧等，連瑪麗醫院重建都受阻，拉布議員有「幾為」基層呀？唔好傻啦唔該！

再講，佢哋爭取既全民退保計劃，要實行可能關乎稅制改革，佢哋有冇問過中產先？有冇問過市民加稅幾多先接受到先？如果要檢討稅制，閒閒地都要幾年時間，而家啲議員事無大小都「拉布」，講白啲就係想癱瘓政府，等新政策出唔到台，焗住只可以用返舊年個預算，最終受害既，咪又係我哋啲小市民囉！