交代「佔中賬目」係道德責任
交代「佔中賬目」係道德責任

違法佔中後好似失咗蹤咁嘅發起人戴耀廷,最近又再「蒲頭」,喺個座談會度大談香港既前途。講真,自從戴副教授同陳健民副教授,以及朱耀明牧師提出搞佔中後,香港已經停滯咗兩年幾,日日夜夜喺度鬧交,由戴副教授去講「香港前途」真係有啲諷刺。

佔中完咗差唔多大半年,「佔中三子」至今仲未清楚交代賬目,仲間接引發咗港大副校長任命風波等政治事件,牽連之廣,並無隨住佔中失敗而完結。

受影響大眾想知資金來源

79日違法佔中,影響有幾大、導致幾多不便、商戶經濟損失之多,社會撕裂,家人朋友反晒面,大眾記憶猶新。佔中行動規模之大,牽涉資源之多,受影響嘅大眾想知道佔中行動背後嘅資金來源、邊個係金主、錢點樣用,其實十分合理。

呢方面,一直响鏡頭之下嘅佔中發起人戴耀廷,當然係責無旁貸要交代喇。嗱,前排佢被人揭發2013同2014年一共收咗四筆合共145萬既匿名捐款。四筆捐款分別係由前法律學院院長陳文敏經手,聲稱用於舉辦政制發展和法治教育既30萬、用於佔中「6.22電子公投」既80萬元、20萬畀人文學院院方進行信仰與法律研究以及15萬元用於聘請研究助理,但嗰位研究助理其實有參與佔中「商討日」同「電子公投」既工作。

最慘係大家去到最後先知,其中130萬匿名捐款係嚟自朱耀明,但就用咗「本地熱心市民」名義去捐。朱耀明一介傳道人,點樣大嗱嗱拎130萬出嚟?呢個謎團都未解架!

咁究竟啲錢真係做相關法律研究抑或有人喺大學搞違法政治動員、佔中政治宣傳?唔可以口講口賠,有人有疑問,戴耀廷梗係有責任清晰交代。

處理四筆過百萬捐款「離奇失準」?

戴耀廷喺座談會回應記者關於「佔中」賬目既提問時,一時話「賬目做緊」,一時話「會公開架嘞」。講真,佔中完咗大半年喇,仲要市民等幾耐呀?佔中舊年6月已經話「和平佔中秘書處已委托專業會計師和核數師核實所有收支,市民亦可在和平佔中網站查閱財政報告」,份聲明發咗成年有多,但盤數就影都唔見,咁既回應好唔符合預期囉!

仲有,近日有報道話,戴耀廷收咗借出銀行戶口畀「佔中」既「民網」十五張共78萬港紙既支票,到底係唔係真有其事?同用朱耀明名義捐款畀港大呢件事有冇關係?戴耀廷又有冇用「佔中」捐款喺港大做佔中宣傳及動員?呢啲問題,相信公眾都好想知!

大學收捐款,要提供捐款人資料可謂正常不過,但偏偏戴耀廷、陳文敏竟然喺處理佔中捐款時疑似「失準」,就連港大個審核委員會都話佢哋既處理「偏離應有預期水平」啦!佔中一日唔清清楚楚交代盤數,呢啲疑竇肯定不斷產生,佔中三個發起人冇理由唔知架喎!

如果佔中筆筆捐款都光明正大見得人,麻煩戴耀廷就快啲交代嘞,呢個未必係法律責任,但一定係道德責任囉!香港無端端畀人佔領咗79日,市民梗係要知道邊個畀錢同埋點樣搞咁大場大龍鳳喇!

原圖:bastillepost

評論