一直被指有離心的前公民黨立法會議員終於宣布退黨兼辭去立法會議員議席，糾糾纏纏、紛紛擾擾，終於有個解脫。辭職補選會觸發甚麼政治效應，尚待觀察，泛民派咩人出嚟補選，當然受人關注啦，而建制派唔派人補選，其實亦有懸念。

現時喺立法會裡面，泛民同建制議員喺直選部份既比例分別係18同17，如果今次建制拎到呢個懸空議席既話，呢個維持多年既局面就可以打破。泛民人士同支持者之前成日話，自己喺「直選」部份一直領先建制，藉此霸住道德高地，自詡係獲得市民授權既一方。

建制參加補選考慮多

贏到當然好，不過建制方面要考慮既其實都唔少。首先，選舉既野，冇話贏梗架嘛，如果補選又輸的話，會唔會又畀人口實，話建制係社會既少數呢？再者，政改剛剛結束，社會對政治議題雖然厭惡，但唔多唔少內心都仲有意識形態鬥爭既想法，呢種局面對建制係唔係好事，而家都未可知。

講到意識形態同炒作政治議題，喺香港泛民認咗第二，都冇人敢認第一。今次補選，泛民又會打出乜嘢旗號同議題，好明顯係好值得關注。例如，如果泛民成功喺社會上製造到氛圍，話呢個係對中央同特區政府既信任投票，甚至話係一個「變相公投」的話，咁就真係要小心喇，因為如果跟住泛民劇本走，建制又贏唔到的話，咁就真係大件事，變相為「公投」背書咪死得？

反而泛民方面要考慮既就唔太多，泛民中人辭職，再派人補選，唔理係邊個都好，都好合情合理。泛民今次補選既包袱細，議題又任佢哋搬，話建制完全處於被動都唔誇張。

區議會選舉會否因補選變得政治化？

再講，建制派近日既政改投票「甩轆」事件，對整個建制既傷害亦好大，雖然距離補選都差唔多半年，但短短幾個月可唔可以成功「洗底」，而家仍未可知。再者，大家唔好唔記得，立法會新界東議席補選之前，仲有一個全港既區議會選舉，一般相信，建制仍然係區議會選舉既大贏家，但由於兩個選舉時間極近，泛民又會唔會刻意將兩個選舉綑綁，藉以拉抬選舉聲勢呢？

就算畀建制贏到補選，但如果區議會選情受影響既話，相信建制亦未必肯制。大家唔好唔記得，嚟緊呢屆區議會選舉，冇晒委任議席架喇。講到尾，筆者認為，建制去唔去馬既關鍵，在於未來兩至三個月，可唔可以掌握到輿論同社會既「話語權」。簡單啲講，雙方陣營如果要參加並贏到場補選，首要條件就係邊個劇本同論述較紮實，市民跟邊一面既劇本行，邊一面就好有機會贏喇。

今次前公民黨議員辭職引發既補選，幾可肯定成為另一波政治爭拗既戰場，建制唔玩既話，泛民當然就冇戲唱啦，但睇住泛民輕輕鬆鬆取回議席，建制中人又係咪甘心呢？況且，拎到呢個議席，對2016年立法會選舉都有好大影響。但建制亦要撫心自問，搞政治論述夠唔夠泛民耍家先？

總而言之，今次建制處境可以話係十分尷尬，玩定唔玩、去定唔去，睇嚟建制內部都會有一番爭論。

原圖：網絡