美媒抹黑冬奧 美運動員看不過眼?
美媒抹黑冬奧  美運動員看不過眼?

最近網上瘋傳一條冬奧記者會短片,美國自由式滑雪Aaron Blunck發言時語出驚人,話喺美國見到大量關於冬奧嘅不負責任報道,其實全都係假嘅(completely false)!佢仲大讚中國喺冬奧嘅防疫措施做得非常優秀,話從工作人員到核酸檢測員,到住宿條件,或者可以講係佢哋參加過嘅最中一個最好嘅冬奧運動會。囍雨想講,運動員係最直接同親身體驗到北京冬奧,佢哋嘅真實感受係最有說服力,今次證明咗北京冬奧真係搞得好成功,而一眾想盡辦法抹黑冬奧嘅美媒,咁樣比「自己友」踢爆、公開批評,真係醜出國際、丟架!


是媒體還是政治宣傳機器?


講真,囍雨今次就唔係覺得幾驚訝,事實上美國媒體嘅可信度不嬲都麻麻。唔係得囍雨自己一個人講,舊年英國牛津大學「路透社新聞研究所」調查發現,美國媒體嘅信任度只有29%,係46個受訪國家之中排名包尾,仲差過菲律賓同墨西哥等地;同年美國民調機構蓋洛普調查發現,美國人對媒體信任度跌至史上第三低,仲有成三分之一同受訪民眾講根本唔信任美國媒體。當連美國人都唔信任自己媒體,佢哋係咪要檢討吓?如果媒體連公正、持平都做唔到,成日以偏蓋全、「作故仔」而唔係報道緊事實,民眾又點會信任你?呢種媒體仲有咩存在意義?美媒及一眾西方媒體,近期不斷抹黑冬奧,與其話係傳媒機構,根本更加似政治宣傳機器。


報道負面 別有用心


美媒等西方媒體近期報道冬奧新聞, 大部分都係相當「負面」,甚至可以講係不盡不實。早前外媒大肆報道今屆冬奧開幕式喺美國收視較往年「低」,仲聲稱可能同「外交抵制」有關;但係奧林匹克轉播服務公司日前就公布咗,北京冬奧已成為至今收視率最高的一屆冬奧會,收視率喺部分歐美冬奧強國有成倍增加,甚至打破紀錄,仲引起全球社交媒體逾20億人關注,成績可以話係相當之好。美國對於冬奧收視破紀錄,一係就低調報道,甚至係提都唔提,大家就知道佢哋咩立場啦。


囍雨覺得最搞笑嘅係,外媒諗盡方法想唱衰冬奧,可能賽事場地無咩好挑剔,就轉講少部分運動員對住宿、飲食好似唔多滿意。但係囍雨簡單睇社交網站,已經見到多國冬奧選手對安排讚不絕口,甚至貼晒選手村飯堂嘅美食相同大家分享。好似美國單板滑雪選手Julia Marino就話,每次訓練完都會返選手村食餃子,入住以嚟大約食咗成200隻,相信都幾滿意飯堂嘅食物;仲有挪威選手Filip Fjeld Andersen,就話選手村食堂美食太多,令佢食到停唔到口,回國可能會肥5公斤;仲有日本記者抱不平發聲,話日本選手們都覺得食堂美食種類豐富又好吃,反而係要控制體重,所以唔食得太多。


美國成日拎住「新聞自由」,對其他國家指指點點,講到好似「高人一等」咁,但根本自己嘅傳媒生態都係烏煙瘴氣,連美國人都唔相信傳媒。你哋搞掂自己嘅問題,先好學人扮「專家」啦!


原圖:新華社、Aaron Blunck社交網站專頁


請Follow我們的YouTube頻道:https://bit.ly/2kgU8qg


下載我們的手機應用程式,收看第一手精彩內容:https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

35
好正
7
心心眼
11
好好笑
5
令人傷心
6
嬲爆

評論

  • +85298****49
    +85298****49
    3月前
    0 回應
    Excellent
    • +85298****49
      +85298****49
      3月前
      0 回應
      Excellent
      • Happy21
        Happy21
        3月前
        0 回應
        :blush:

        沒有更多評論

        沒有更多評論