自從反修例風波過後，移民問題再次成為熱話，而因為台灣嘅語言文化較相近，加上台灣領導人蔡英文大大聲話要與港人同行，唔少人都視台灣為移居首選地。幻想總係美好嘅，現實根本係另一回事，台灣移民審查愈收愈緊，想入籍似乎真係難過登天。最近有外媒訪問其中一位「受害者」，事主陳女士就係咁，移民不成仲搞到一肚氣……

因內地出生 遭拒批入籍申請

現年四十多歲、自稱政治立場「深黃」嘅陳女士，同丈夫都係小時候由內地嚟香港讀書，之後落地生根，一直經營生意。早前受反修例事件爆發等因素觸發，喺2019年年底經投資移民去覺得較「自由」嘅台灣。正當陳女士同丈夫喺台灣建立好事業基礎，就連子女講國語都比廣東話好嘅時候，突然收到惡耗，移民申請遭否決，只獲兩年居留許可，拒批原因只有一個，就因為喺內地出生。結果搞完一大輪，又驚將來台灣唔續批居留許可，惟有死死地氣及早回流返香港。

陳女士都有句都問得幾啱，「上幾代人，有邊幾個唔係由內地去台灣？」、「香港嘅梁天琦同黎智英都係內地出生，台灣又會唔會畀佢哋去台灣？」。答案係點，大家心中有數，依家台灣移民政策落閘，好大程度係基於「安全」風險，擺明係唔信你啲香港人。總會有啲人會好天真咁諗，兩岸關係愈發緊張，台灣會更加大力幫香港人，移民政策實會愈來愈鬆啦。囍雨可以同大家講，呢啲只係一廂情願嘅諗法。

錯信了蔡英文的下場

囍雨之前都講過，台灣舊年起收緊移民審查，有三類人基本上好難獲批，分別係內地出生、曾任香港公務員或宣誓效忠過，甚至做過中資公司都未必得。淨係計呢幾類人士，都已經踢走咗唔少人，囍雨唔係空口講白話，大家只要去社交網站，就會睇到有啲「台灣入籍困難」群組。上面有唔少案例，就連撐反修例嘅醫護，想用技術移民過台灣似乎都有啲阻滯。投資移民又唔得、技術移民又多掂，啲有案在身嘅「手足」，係咪仲難成功移民到？仲有，依家就話拒絕三類人，之後會唔會又擴大紅線？

罪魁禍首其實都係蔡英文，當初打香港牌吸選票，仲講到咁好聽，搞到一眾香港「手足」對自己移民台灣充滿幻想同盼望，依家就係一盤冷水淋落大家身上。最慘嘅係咩？有啲人賣車賣樓，放棄高薪厚職搞移民，最後兜兜轉轉都係要返香港，既然係咁，點解唔安安穩穩喺香港生活？起碼係自己地方，肯定唔會比人趕走先！

原圖：星島日報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk