《信報》特約評論員練乙錚撰文，指特首梁振英女兒齊昕既處境，同香港人既縮影好似。練先生既文中劈頭就指出，「屬於私事的部分固不必提，其餘三類與法律及公眾利益相關的，則因為訊息嚴重不足，孰是孰非目前還未能準確判斷，有待傳媒及包括議員等專責監督政府行為的人士追查」。

講得真係好，可惜呢啲只係練乙錚逃避責任既手法！

講到人哋家事呢味嘢，本來就應該少講為妙；當然，如果事件涉及公眾利益或者犯罪行為，作為評論員及傳媒人，講，亦無可厚非。但講還講，乜都要有條底線，佢自己都講得出「訊息嚴重不足」，咁仲憑乜去寫出一篇洋洋灑灑近四千字既鴻文呢？

評論文章既分析，起碼都要有基本事實去支持，否則就係無的放矢、亂咁嚟！唔好以為喺一開始講定幾句打底就可以免責先得架，成篇文除咗頭第一段可以叫做正常外，其餘都係九唔搭八、無限上綱既推演，連基本事實都唔清楚，之後既演繹又點可以叫做公允？

再講，梁振英一家發生咩事，外人無從得知，不過囍雨肯定知道既係，連當事人齊昕都承認自己要接受情緒輔導，咁到底練乙錚憑咩話梁振英承認個女有病係講大話呢？練氏篇文講到實牙實齒咁，似乎有第一手資料喎，唔通佢裝咗偷聽器去禮賓府？定其實佢根本係梁家成員肚裡面既一條蟲呀？又還是練先生用咗違法手法得到梁家既家書呢？

嗱嗱嗱，囍雨冇證據架，完全斷估，反正以練氏既手法同邏輯，冇證冇據都可以亂寫接近四千字，我咁推論都唔算違法吖。不過咁，為免惹禍上身，等我都寫返個「免責聲明」先：「上述內容，茲因訊息嚴重不足，孰是孰非目前還未能準確判斷，有待傳媒及包括警方和私隱專員公署等執法機構追查」。

好啦好啦，囍雨認喇，估計練氏違法又真係誇張咗既，最多咪道歉囉。態度唔夠誠懇呀？好過練乙錚啦，佢由始至終都未道過歉喎，囍雨覺得自己好叻叻架喇。我唔知練氏有冇子女，或者佢同家人關係係點，唯一肯定係，如果佢有子女仍然會用咁涼薄既手法去攻擊政敵既話，我會好驚訝囉。

唔用病人既病情去攻擊病者既家人，講唔上係乜嘢社會規範，頂多係做「人」既基本標準。呢點都做唔到，即係連做「人」都冇資格，「人」都唔係既話，更加談唔上做「學者」或者評論員。我理得你乜嘢立場、理得你係乜嘢博士，唔該返去由幼稚園開始讀過，由頭開始學做「人」先！

哎呀哎呀，囍雨仲係巧京京，整多次免責聲明先：「練氏是否有資格稱為人，茲因訊息嚴重不足，孰是孰非目前還未能準確判斷，有待社會大眾及傳媒繼續追查」。

原圖：RTHK