推動國民教育 由升旗禮做起
推動國民教育 由升旗禮做起

 國民教育一直係香港缺失嘅一環,多年嚟仲畀反對派「污名化」,甚至抹黑做「政治洗腦」,但係認識自己國家、了解國情,加強年輕人對祖國認同感,其實根本無問題,就算係外國都一樣會喺咁做。近日,教育局公布新指引,明年起中小學逢上學日、元旦日、七一及國旗日須升掛國旗,一星期進行一次升國旗儀式。囍雨想講,呢啲措施本來一早應該要做,當然值得支持,但與此同時見到有啲學校嘅回應,真係當場嚇一跳……

 

學校要從「淘寶」買區旗?

 

竟然有學校話,校內無設旗杆,要急住同香港升旗隊總會等,或者考慮係去「淘寶」入貨,甚至有人建議政府向學校派發區旗;而且有部分學校無設有正統嘅升旗儀式專隊,所以依家要著手訓練。從簡單一件事就睇到,過去喺國民教育呢方面嘅工作,真係做得唔夠。學校作為教育最前線,升國旗儀式係重要嘅國民教育之一,應該一早做好相關準備,跟足標準規格去做;但係,依家去到教育局發新指引,部分學校先至好似要臨急臨忙去籌備,真係唔太理想。

 

當局應提供軟硬件配套

 

囍雨仲留意到,有教師同學校,對升旗儀式嘅具體安排同要求,似乎都係唔太認識。不過好在,距離措施落實仲有幾個月時間,教育局其實可以考慮提供培訓,唔單止畀校長、教師們,知道升旗儀式要點做;更重要嘅係,要令教師們知道,點樣透過升旗禮,去傳達正面訊息,培養學生正確價值觀,對國家同民族嘅認同感。如果教師都唔知點做,又點教育學生?教育局未來應該加強同學校聯絡,了解佢哋嘅需要,提供軟硬件支援,咁樣先可以令到措施順利推行,達到預期嘅效果。

 

不過又咁講,今次教育局推新指引,就肯定又會有反對派質疑,話係想對學生「洗腦」。囍雨想強調一點,升國旗儀式只係平常嘅國民教育,就好似新加坡嘅學校咁,甚至係會天天舉行升國旗儀式,風雨無阻。外國都係咁做,甚至規格可能更加嚴格,香港依家做又有咩問題?過去國民教育喺香港有幾不足,一場反修例暴亂,大家已經都睇得清清楚楚,教育局依家從不同層面處理,不論係加強國民教育嘅課程內容,或者係最近嘅升旗儀式指引,都係撥亂反正、向緊正確嘅方向去邁進。不論反對派點樣抹黑、妖魔化,教育局為守護下一代,必須擇善固執、頂住壓力繼續執行下去,香港未來才有希望。


原圖:星島日報

請Follow我們的YouTube頻道:https://bit.ly/2kgU8qg


下載我們的手機應用程式,收看第一手精彩內容:https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

23
好正
10
心心眼
4
好好笑
0
令人傷心
0
嬲爆

評論

  • honsangyiu@gmail.com
    honsangyiu@gmail.com
    2年前
    0 回應 檢舉
    • +85298****49
      +85298****49
      2年前
      0 回應 檢舉
      Excellent
      • +85298****49
        +85298****49
        2年前
        0 回應 檢舉
        Excellent

        沒有更多評論

        沒有更多評論