港台撥亂反正 指日可待
港台撥亂反正 指日可待

香港電台過去亂象百出,但自從廣播處長李百全上任之後,大家終於看到港台有重回正軌嘅希望。今年初政府公布《香港電台的管治及管理檢討報告》,就港台人員管理、內部編輯等六大方面作出建議,當時港台話明會認真研究跟進。事隔7個多月後,港台終於行動,今日就向員工發出《香港電台編輯政策及流程》文件,等佢哋可以更好咁了解港台政策同指導原則,做好作為公共廣播機構同政府嘅責任。成份文件有93頁,闡述港台角色,以及多項編輯政策,包括「一國兩制」、不偏不倚等。囍雨覺得,依家有一份統合性守則,將原則講得清清楚楚,員工可以避免觸紅線,絕對係好事!


文件內容只是「舊酒新瓶」


囍雨都知道,港台每次出手整頓,實會有人雞蛋裡挑骨頭,抹黑話係想「打壓」、「箝制」員工云云。但係睇返今次份文件,不少內容其實都係熟口熟面,因為文件係參考咗現有嘅《香港電台約章》、《節目製作人員守則》同通訊局嘅業務守則等所編制而成。簡單啲講,只不過係「舊酒新瓶」,將既有規範同編採守則再重申一次,畀港台員工更加了解編輯政策和工作流程。呢啲守則規章一直存在,港台員工本來就應該遵守,只係最基本嘅要求,試問又點會係「箝制」?


前車可鑑 無可厚非


公道啲講,港台咁做都係無可厚非。相信大家都仲記得,之前港台節目頻頻出事,例如港台英文節目「The Pulse」,主持人訪問世衞組織官員,詢問係咪容許台灣加入世衛嘅問題,做法就明顯違反「一個中國」原則。所以今次文件入面,都有講到明,員工不應將台灣稱為或視作「國家」看待。港台作為公共廣播機構、政治部門,必須要尊重憲制秩序同「一國兩制」,仲要肩負維護國家安全嘅憲制責任。就算今次港台無發布呢份文件,員工都應該有所自覺去做;大家都諗到,如果港台一邊拎住公帑營運,一邊反政府,咁樣點都講唔通啦!


仲有仲有,之前港台成日畀人批評,節目內容偏頗,就好似之前嘅節目《頭條新聞》,竟然公然污衊和侮辱警員,仲畀通訊局裁決投訴成立,發出強烈勸諭。問題擺在眼前,本來港台應該揸正嚟做,但係過往嘅廣播處長在任期間,就成用「編輯自主」嚟做擋箭牌,逃避追究有關員工嘅責任。今次文件寫到明,廣播處長係港台總編輯,為港台作最終編輯決定,並就相關決定負責。相信將來一旦「出事」,亦都可以盡快釐清責任。而且港台仲列明「必須上報事項」,如果港台日後想訪問涉犯《港區國安法》嘅疑犯、報道太子站8.31「警察打死人」等未經證實假消息,都要一律上報咗先,避免「問題報道」出街。長遠嚟講,無論係對編採質素同維持傳媒公信力,都有正面幫助。


以往港台嘅問題,政府報告又提過,市民大眾嘅批評都唔少,依家見到李百全真係有心整頓內部風氣、撥亂反正,大家肯定會支持。港台各種問題根深柢固,或者唔係一朝一夕可以解決到,但最起碼大家見到,港台係願意踏出一步,有改革嘅心,只要能夠持之以恆,保持中立、不偏不倚,盡公共廣播機構嘅責任,相信會能夠慢慢取回市民嘅信任。


原圖: RTHK


請Follow我們的YouTube頻道:https://bit.ly/2kgU8qg


下載我們的手機應用程式,收看第一手精彩內容:https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

19
好正
7
心心眼
4
好好笑
1
令人傷心
1
嬲爆

評論

  • +85298****49
    +85298****49
    2月前
    0 回應
    Excellent
    • 龙一吟
      龙一吟
      2月前
      0 回應
      既然打開了,一定堅強修正滅歪,清除垃圾毒瘤。
      • acp4711@yahoo.com.hk
        acp4711@yahoo.com.hk
        2月前
        0 回應
        good

        沒有更多評論

        沒有更多評論