為何不信有外部勢力?
為何不信有外部勢力?

香港有冇外國或境外勢力干預?任何心水清嘅市民,都知道答案一定係有,喺反修例運動期間,甚至有參與示威、集會嘅市民講到明要求外部勢力干預香港。呢個簡單、直接嘅問題,竟然有人嘅答案會係質疑或否定。特首林鄭月娥日前接受電台訪問時表示,在上屆政府出任政務司司長時,經常質疑時任特首梁振英提及香港有好多外部勢力,但經歷過去兩年,佢確信有唔少外部勢力衝擊中央同特區政權,並對此「深信不疑」。囍雨喺度諗,點解香港會有官員質疑外部勢力存在嘅說法?係敏感度不足?定係港英殖民政府訓練出嚟嘅政務官,對外部勢力一直「不以為然」?

 

美官員親口承認干預香港?

 

反修例運動開始,令過往唔相信有外部勢力嘅人士,都開始相信香港有受外部勢力干預,但其實早喺反修例運動之前,香港已經「黑手處處」,例如幾年前,即係違法佔領期間,據報時任美國國防部顧問白邦瑞(Michael Pillsbury)接受訪問時,就親口承認美國政府有份介入行動,又指美方有份透過NED(美國國家民主基金會)提供數以百萬計嘅資金,協助香港推動「民主」;而根據NED年報,該基金曾於2012年撥出75萬多美元(即約580多萬港元)予香港。呢啲新聞,雖然係舊聞,特區政府嘅官員以至政務官,有冇察覺到?細想過當中因由?

 

囍雨認為,香港喺幾十甚至一百年前,就已經喺外部勢力活躍嘅地方;直到近年,外部勢力之所以仲「活躍」於香港,甚至公然表明會支持香港嘅「民主」運動,著眼點唔係「香港一個地方」,而係希望透過香港影響中國;或者講得白啲,係借香港打擊中國。作為特區政府嘅官員,包括政務官,如果真係「質疑香港有很多外部勢力」,係咪反映香港有官員敏感度不足呢?

 

不是政治 是常識問題?

 

坦白講,囍雨甚至唔認為「有冇外部勢力」係一個政治判斷問題,因為由違法佔領到反修例運動,外部勢力例如係想「置中國於死地」嘅國家,根本就係一次又一次借香港嚟搞中國,只要有留意新聞,再加以簡單嘅思索都會諗到,可以話係一個常識問題!所以,如果特區政府嘅官員、政務官對問題「視而不見」,咁唔單止政府管治可能會出問題,所影響到嘅,甚至可能係我哋嘅國家同中央政府。今日,有官員承認「香港在地緣政治,在中美鬥爭內一個重要地方,甚至形容是美、西方勢力打擊中國或反華勢力的橋頭堡」,係咪為時已晚,囍雨唔敢講;但如果下下「有事」,甚至「出事」之後先嚟察覺,其實係攞緊整個香港嘅安全穩定嚟玩,囍雨認為特區政府官員嘅警覺性,應該要加強,我哋實在再承受唔起「二次黑暴」。 


請Follow我們的YouTube頻道:https://bit.ly/2kgU8qg


下載我們的手機應用程式,收看第一手精彩內容:https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

15
好正
2
心心眼
4
好好笑
2
令人傷心
7
嬲爆

評論

  • +85298****49
    +85298****49
    2月前
    0 回應
    Excellent

    沒有更多評論

    沒有更多評論