自己著草 叫人「繼續戰鬥」?
自己著草 叫人「繼續戰鬥」?

反修例「暴力化」行動踏入兩周年,雖然事過境遷,但係一眾反對派政客仍不忘抽水,各自喺網上發帖文「懷緬過去」,與手足們「圍爐取暖」。走佬政客羅冠聰昨天就發帖文,一邊回顧過去兩年嘅事,一邊「鼓勵」同路人,話仲見到有人喺香港繼續以不同方式堅持抗爭,叫港人要先照顧好自己,撫平同癒合創傷後,再「繼續戰鬥」。廣男想講,羅冠聰自己喺外國「嘆世界」,就叫香港嘅同路人去「戰鬥」,啲係咪叫「精人出口、笨人出手」?

 

自身難保還散播假希望? 

 

除咗羅冠聰之外,連仲還押緊嘅社民連吳文遠,都有托人喺社交網站發布事前錄低嘅影片。吳文遠喺條片入面呼籲港人「千萬、千萬、千萬不要放棄」、終有一日「可以再上街,與港人同行,繼續抵抗獨裁政權」。廣男覺得,無論係羅冠聰定吳文遠都好,佢哋似乎想營造一種氣氛,想話畀大家聽「抗爭」仲未完,好似仲好有希望咁,想其他人繼續「行落去」。但係呢啲說話,由身在囚房同潛逃外國嘅政客口中,叫人點樣信你哋?都已經自身難保,仲要散播假希望?

 

前車可鑑 政客擺明靠害

 

政客繼續叫人「戰鬥」、「抵抗」,其實擺明靠害,係咪想其他香港人同佢哋一樣,要走佬、受囚獄之苦?整場反修例風波已經有咁多人被起訴,甚至罪成被判監,如果羅冠聰同吳文遠真係「關心」同路人,係咪應該叫佢哋盡快收手,而唔係繼續煽風點火?就算係反對派支持者,都應該要明白前車可鑑嘅道理,違法或者暴力抗爭根本行唔通,除咗對社會造成破壞,搞到自己「一身蟻」,到底又爭取到過啲咩?

 

如果羅冠聰想再「戰鬥」,  方法好簡單,只要返嚟香港「親身上陣」就可以,絕對唔洗假手於人。不過,羅冠聰本身就係怕承擔罪責,先要走佬去外國,加上依家佢仲畀警方通緝緊,恐怕都唔會願意返嚟。羅冠聰自己咁「錫身」,喺外國打虛無縹緲、一直見唔到成果嘅「國際戰線」,用口水搞抗爭,賺盡知名度,但係就叫香港嘅「手足」去「戰鬥」,咁樣點講得通? 若然有人相信羅冠聰,之後「出咗事」,佢諗住點樣負責?係咪到時又發多一個帖文,叫人「撫平創傷」咁就當無事發生?


圖片來源:羅冠聰社交網站專頁、吳文遠社交網站影片截圖


請Follow我們的YouTube頻道:https://bit.ly/2kgU8qg


下載我們的手機應用程式,收看第一手精彩內容:https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

7
好正
0
心心眼
8
好好笑
0
令人傷心
2
嬲爆

評論