選？唔選？一個簡單如普通市民都有想法嘅問題，反對派嘅一眾政客好似無立場咁，予人感覺優柔寡斷、猶豫不決。今日，囍雨睇新聞，見到社民連首先表態，表明唔會參選特首選委會同立法會選舉，稱要拒做忠誠廢物？先不論社民連選唔選嘅問題，睇番社民連喺議會之內嘅「往績」，會唔會係「不忠誠廢物」先真？

講起「往績」，囍雨幫大家向前數多幾年、數多幾屆，社民連出過的立法會議員，基本上「一隻手數得嗮」，當然，人數多寡唔係問題，但佢哋為民為施政有過咩論述、做過幾多有建設性嘅事？講真，囍雨真係冇乜印象，但調番轉頭，喺議會之內掟嘢、叫囂、拉布、破壞，就似乎經常見到有佢哋份。

擅長的做唔到 該做的唔擅長？

其中嘅「經典」案例，包括梁國雄「搶文件」、黃毓民「掟杯」，甚至連支援生活上有經濟需要長者嘅「長者生活津貼」議案，都一度被梁國雄以過百項動議企圖拖垮。時至今日，大家唔好忘記，有部分社民連成員有份參加所謂嘅初選，而初選嘅目的，似乎係要攬炒政府。呢種「參政」，佢哋自己或者覺得好型，但對香港對市民，有咩好處？

喺呢啲前提底下，講真，就算無完善選舉制度，囍雨覺得社民連成員都未必入到閘；退一步講，就當佢哋派人去選立法會直選而又入到閘，未來又打算點做？一來冇乜有建設性嘅論述；二來，繼續掟嘢、搶嘢、拉布攬炒？完善選舉制度之後，成個遊戲規則已經唔同咗，佢哋如果繼續好似以往咁搞事，輕則可能被趕、重則可能被罰甚至被DQ，基本上已經「無用武之地」，簡單嚟講，即係做唔到擅長嘅嘢，應該做好嘅嘢又「唔擅長」，咁仲選嚟做咩呢？所以，社民連唔選嘅理由，未必完全係佢哋講到咁型嘅。

請放棄區議會陣線

坦白講，如果社民連對政府、政權如此不滿，咁佢哋唔單止要放棄立法會戰線，其實應該連區議會戰線都放棄喎！一時拒絕做政治花瓶，一時又要喺區議會戰線寸土必爭，當中又有冇矛盾呢？而今日咁多新聞，生果報偏要㨂呢單新聞做頭條，又想表達啲咩？

打埋個算盤，社民連都算係個激進政黨，佢唔選係佢嘅事；其他溫和反對派，係咪要又俾啲激進派騎劫，真係要諗清諗楚。唔選，好似好容易，但一個政黨唔選負責立法嘅議會，仲算唔算得上係政黨呢？

原圖：rthk

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk