郊野公園「可加不可減」?
郊野公園「可加不可減」?

「綠色和平」一位項目主任今日喺報章撰文,表示利用郊野公園邊陲土地興建居屋,「先例一開,繼而得寸進尺,郊野公園將會被逐步蠶食」。囍雨睇相關文章,見到有民意調查,亦見到作者有提及棕地。對於反對開發郊野公園邊陲地嘅問題,囍雨諗到兩個問題,第一係郊野公園面積,係咪只係「可加不可減」;第二,則係開發棕地,囍雨唔反對,但係咪可以棕地同郊野公園邊陲地都開發呢?Why not both?

 

多管齊下 開發土地

 

對於開發郊野公園邊陲地嘅問題,囍雨相信「綠色和平」應該知道,喺2008年,特區政府就將郊野公園範圍一下子擴大咗2,360公頃,依家全國政協副主席、前特首梁振英倡議喺大欖郊野公園邊陲地興建居屋,所要求嘅土地面積係100公頃,相當於政府2008年時擴大面積嘅4%。郊野公園面積「可加不可減」,咁對香港係咪好事?「綠色和平」強調「留給港人與大自然一片自由呼吸的空間」,但如果港人連個安身之所都無,同大自然「自由呼吸」又如何?

 

至於「綠色和平」提及到嘅棕地,囍雨必須要戳破現時社會嘅一啲迷思。當我哋講到開發土地選項,往往講選項A,就好似排除咗選項B咁,反之亦然;其實,不論係填海、開發郊野公園邊陲地、棕地以至開發新發展區等,我們全部都要考慮、研究甚至執行。保守啲講句,如果我哋只集中於某一兩個土地選項,而呢一兩個選項喺規劃、發展時遇到阻滯,咁土地供應好可能就會「無以為繼」。

 

棕地還有重置問題

 

講起棕地,囍雨覺得有啲問題一定要搞清楚,或者俾市民知道開發棕地嘅困難。例如,如果係地理位置優越嘅棕地,要規劃、開發相對地較容易,但大家唔好忘記,有唔少棕地都位置偏僻,而且附近未必有足夠嘅交通或社區配套。另一個問題,就係依家唔少棕地唔係喺度「曬太陽」,而係有唔同業界嘅業者使用緊,有啲用嚟做車房,有啲用嚟擺重型機器,有啲就喺棕地上從事其他作業;呢啲靠棕地提供場所搵食嘅,都係香港人,要點安置佢哋?

 

最後,關於民意嘅問題,囍雨想指出,民意係會變嘅,有市民當日反對,唔代表今日都反對;更何況,依家係非常時期,難道香港仲有比房屋更重要嘅議題咩? 

 

圖片來源:政府新聞處


請Follow我們的YouTube頻道:https://bit.ly/2kgU8qg


下載我們的手機應用程式,收看第一手精彩內容:https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

24
好正
10
心心眼
2
好好笑
0
令人傷心
0
嬲爆

評論

  • +85262****67
    +85262****67
    2年前
    0 回應 檢舉
    邊到起都無所謂,最緊要有瓦遮頭。
    • +85298****49
      +85298****49
      2年前
      0 回應 檢舉
      Excellent

      沒有更多評論

      沒有更多評論