你哋為咩坐監?
你哋為咩坐監?

經歷過前年嘅反修例運動,反對派政客以至支持者,基本上已經係一盤散沙,坐監嘅坐監,還押嘅還押,走佬嘅走佬,移民嘅就移民。囍雨睇到,最近因為「民主派初選」而被控「串謀顛覆國家政權」嘅劉頴匡有封「獄中來信」,寄語港人不應恐懼而離去,又指港人要一齊努力抵抗移民潮,稱「如果香港再冇香港人,我哋為咩而坐監?」係囉,呢班反對派政客,到底係為咗咩事要還押或者坐監?依家先問點解?其實簡單啲講,就係奪權失敗,時辰到,要「找數」啫!


對世界並無改變


據報,劉頴匡指如果能因為坐監而令香港實現民主,就算坐幾耐都「心甘情願」,雖曾「天真」地諗過,政府將民主派「拉晒坐監」係一件轟動嘅事,的確曾經引起轟動,但世界並無改變,只係多咗相對出名嘅人坐咗監;想像中嘅「政治衝擊」,並無出現,仲表示相信當權者對「詭異」嘅平靜同感驚訝。囍雨想講,依家只係一班涉嫌違法嘅政客被檢控、還押或者坐監,劉頴匡想世界「有咩改變」呢?


事情其實非常簡單,就係有政客涉嫌違法,然後執法者就執法,如果劉頴匡等政客以為自己「坐監」會產生好大嘅政治衝擊,甚至「一石激起千重浪」,咁劉頴匡真係有啲「天真」。至於其他反對派政客以至支持者見到「初選」班政客要還押,會有咩反應?最自然嘅反應,梗係走啦,佢哋當中有啲人可能一樣係「心中有鬼」,有啲就接受唔到無得「反中亂港」嘅香港,點會因為劉頴匡等人還押而更加覺得要「留港抗爭」呢?避吉避凶,根本就係人之常情!


奪權失敗 就「找數」吧!


自前年年中開始,一場表面係反對政府修訂《逃犯條例》嘅運動,本質上就係衝住特區政府嘅權力甚至中央嘅管治權而來,當中有人要求不能執行嘅「五大訴求」,有人煽動「港獨」,甚至有人講明要同中央「跳崖」;好喇,中央出手止暴制亂,先制定《港區國安法》,後完善香港選舉制度,街頭暴力被平息,政客亦再無空間勾結外國勢力,難道劉頴匡等人仲會認為佢哋一旦坐監,其他反對派支持者就會好熱血地出嚟抗爭?係,香港人有時係好熱血,但正常嘅香港人,仲好識「計數」呢!


劉頴匡等人係咪「戇居」,囍雨就唔評論,但囍雨直白啲講,相信依家有班反對派支持者係多謝緊佢哋呢班政客嘅;「全靠」呢班政客「攬炒」、「犧牲」,令支持者們更容易移民到外國。反對派支持者去到外國生活好唔好,囍雨唔敢一概而論,但囍雨估計,一定有支持者去到外國仲「記掛」住劉頴匡等人,或者,會有支持者喺英倫海岸一邊飲住蘇格蘭威士忌,然後心諗,「唔知初選班人依家點呢?無論如何,都要『多謝』佢哋」!


圖片來源:中通社


請Follow我們的YouTube頻道:https://bit.ly/2kgU8qg


下載我們的手機應用程式,收看第一手精彩內容:https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

14
好正
0
心心眼
4
好好笑
0
令人傷心
1
嬲爆

評論

  • 龙一吟
    龙一吟
    8月前
    0 回應
    只有一個答案:出賣民族,出賣國家。

    沒有更多評論

    沒有更多評論