出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
反對派「走的走 退的退」
反對派「走的走 退的退」

有一班人,曾經係反政府甚至反中央嘅「最中堅分子」,對佢哋嚟講,反對就係最高原則,甚至佢哋參選,都係為咗「攬炒」議會以至香港;不過,自從《港區國安法》立法後,呢一班政治上「好天真」嘅人,如今「走的走,散的散」。最新例子,就係曾經喺辦事處掛起「光時」旗幟嘅沙田區議員黃文萱,宣布退出公民黨而且表明唔會宣誓;其他例子,則有立法會前議員陳志全退出人民力量、唔會再參與選舉同遊行集會,另外九龍城前區議李軒朗已經離開咗香港。其實,今日嘅局面完全係反對派自己一手造成嘅,如果無2019年嘅反修例運動,或者佢哋都唔會由「從政變成退出政壇」。


高調地「宣獨」


喺呢三個人當中,囍雨想特別講講黃文萱。去年七月初,當時《港區國安法》已經實施,當時黃文萱辦事處被指展示「光時」旗幟(旗幟有「港獨」意味),有警員到場調查,黃文萱指辦事處內所掛嘅係反轉咗嘅「光時」旗幟,所以唔認為係展示旗幟,指警方行動係「靠嚇」,亦唔認為「光時」有顛覆國家意味云云。今日佢唔願意宣誓,甚至稱特區政府修訂宣誓條例係「狼虎之心人所皆知」,其實係咪佢自己做過「踩界嘢」,所以心中有鬼呢?


先講宣誓問題,囍雨又要講句,今次政府要求嘅宣誓內容,其實同黃文萱選區議員時簽署嘅聲明,即係要擁護《基本法》、效忠特區係一樣嘅;黃文萱參選果時唔批評相關聲明,依家就話內容相約嘅宣誓內容係「狼虎之心」?似係佢自己「變咗心」多啲!按照佢嘅往績,如果政府修訂嘅宣誓內容生效,而要將唔符合議員資格嘅人DQ,黃文萱可能係其中一個「高危人士」,佢依家表示唔會宣誓,可能係佢都知自己「大限將至」,所以不如灑脫啲!


公民黨還有「未來」?


至於黃文萱要退出公民黨,囍雨其實唔係太明白當中因由,如果黃文萱已經決定唔宣誓,即係預咗可能無議員做,點解仲要同公民黨「割席」呢?囍雨大膽質疑,黃文萱係咪怕如果唔退出公民黨,自己就算唔做議員而做其他工作都會受到「牽連」?依家一個又一個政客退出公民黨,囍雨真心懷疑,公民黨可能會慢慢「消失於天與地」。最近,有新聞報道指有前議員稱中央「透過不同渠道」叫民主黨人士繼續參選,倘若係真嘅話,囍雨只能夠講,眼下嘅民主黨雖有式微跡象,但比起公民黨,已經好「一百倍」! 

 

圖片來源:黃文萱社交網站專頁


請Follow我們的YouTube頻道:https://bit.ly/2kgU8qg


下載我們的手機應用程式,收看第一手精彩內容:https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

38
好正
4
心心眼
20
好好笑
5
令人傷心
3
嬲爆

評論

  • +85298****49
    +85298****49
    2天前
    0 回應
    Excellent
    • 龙一吟
      龙一吟
      3天前
      0 回應
      反而怕她牽連公文袋吧!
      • +85298****49
        +85298****49
        3天前
        0 回應
        Excellent

        沒有更多評論

        沒有更多評論