又現洗腦黃師 又見教協包庇
又現洗腦黃師 又見教協包庇

因在社交平台公開發表政治漫畫而受關注、網名「vawongsir」嘅黃姓中學教師,據報日前被教育局裁定專業失德投訴成立;雖然尚未有處分結果,但佢本人已經喺facebook宣稱,「最壞打算」係可能被「釘牌」。從反對派角度,必然又會將事件抹黑為政府、教局「清算、打壓」,但囍雨由事件睇到嘅係,又有洗腦黃師出沒、又有教協包庇盲撐。


教壞孩子的漫畫


囍雨絕對明白,漫畫嘅特點之一包括針砭時弊;但「針砭時弊」,係咪就等於可以偏頗政治立場、毫無事實根據地抹黑、無理指控、甚至煽動仇恨呢?例如涉事教師嘅「作品」,包括指控香港「法治已死」、「警黑勾結」;將「偷呃拐騙」字眼同國旗、政權旗幟「相關聯」;又例如其中一副作品,一名男子被人以左輪手槍射擊,並寫上「我只是赤手空拳 你卻荷槍實彈」等等,大家認為,佢嘅讀者以至學生,從中受到嘅係一種點樣嘅「教育」?


問題係,該名教師唔單止冇檢討自己問題,反而諸多狡辯,一時話呢啲漫畫只係抒發個人意見、並冇用嚟當教材,一時又話「原來視藝教師課餘畫畫也是錯的」,更表明如果被釘牌,日後不論開班或「全身投入藝術行列」,都希望「繼續教育下一代」。教協副會長葉建源嘅包庇之辭同樣離譜,竟然話「老師作為市民,對時下社會問題或施政情況有意見,在社交媒體發表,看不到與其專業表現有何關係」。囍雨想講,香港教育出問題,就係因為有呢啲「教育工作者」!


「課餘」時間就可違背專業道德?


首先請搞清楚,「個人意見、言論自由」唔等於冇限制冇底線、唔使負責;冇用漫畫「當教材」,但透過網絡平台公開發表,學生、年輕人一樣會受到偏頗立場或者錯誤思想嘅影響,甚至被洗腦、種下仇恨。尤其重要嘅係,身為教師,其實無論係咪「課餘、工餘」時間,都唔代表可以發表無理指控或者煽動言論,一樣可能有違專業道德,唔通老師「放咗工」就唔係老師?對於呢個問題,作為「教師專業代表」嘅葉建源,點解又淨係從「市民」身份、角度出發呢?套用佢嘅邏輯,係咪休班警遇到罪案可以「唔使理」,醫生放工之後就可以「見死不救」?


經由此事,囍雨想大家睇清一點,就係依家香港社會,有啲洗腦孩子、煽動仇恨嘅言行,隨時都可能「潛伏」喺你我身邊,冇咁易「絕跡」;市民、家長都要保持警惕,一旦發現問題,就要好似今次有人舉報咁及時出聲,如果大家都「事不關己」,最終受荼毒嘅,係我哋下一代。


原圖:RTHK、「vawongsir」社交網站專頁

請Follow我們的YouTube頻道:https://bit.ly/2kgU8qg


下載我們的手機應用程式,收看第一手精彩內容:https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

44
好正
5
心心眼
2
好好笑
3
令人傷心
24
嬲爆

評論

  • 中國人
    中國人
    6月前
    0 回應
    一個警員是否下班後就可以不顧警隊的形象嗎?
    • +85298****49
      +85298****49
      6月前
      0 回應
      Excellent

      沒有更多評論

      沒有更多評論