2016年7月中，改革醫委會嘅《醫生（註冊）修訂條例草案》，經過立法會三星期共七日審議，因為醫學界議員梁家騮「獨力拉布」、點人數最少120次，終於喺立法會「收爐」時被拖垮，擾攘咗超過十年嘅醫委會改革未能前進一步，甚至連反對派媒體都引述病人組織指，呢個係政府、醫生同病人嘅「三輸」局面，批評醫生團體挑動醫生反對草案。睇到呢單「一人拉布，拖垮議案」嘅例子，大家諗到咩？廣男所諗到嘅，就係《議事規則》一定要修改！

違規議員 或須停職

執筆之時，立法會大比數通過修訂《議事規則》，包括引入「停賽」制度、收緊處分行為極不檢點議員嘅罰則以及壓縮議員發言時間等；「唯一」投咗反對票嘅熱血公民議員鄭松泰就表示，相關修訂扼殺議事空間，仲話全國人大已經決定修改香港選舉制度，理論上日後所有立法會議員都會符合「愛國者」嘅標準，認為修改《議事規則》係「多此一舉」。對於鄭松泰嘅講法，廣男必須講句，「我唔同意」！

道理其實好簡單，立法會今日「無人拉布」，唔代表將來都無。舉個例子，如果有政客以「愛國者」面目參選而過關兼當選，佢哋入到議會，有冇可能借議事之名，行「拉布」之實呢？其實係有可能嘅，所以除咗確保「愛國者」治港，係立法會嘅《議事規則》方面落工夫，廣男認為係一種雙重保障，依家建制派議員做多一步，絕對無做錯。

議會應為市民服務

就如立法會員謝偉俊所言，過往針對行為不檢議嘅懲罰，「一係趕出場、一係用《基本法》機制罷免」，係過分寬鬆或嚴格，而今次修訂《議事規則》，可以話係中間落墨。廣男就覺得，修改咗《議事規則》，最重要嘅係議會日後運作順暢，能夠有效審議同通過各項民生相關嘅議案，一個立法會，本來就應該為民做事，而唔係單純「為政治服務」。

經過前立法會議員郭榮鏗利用「鑽空子」喺內委會「拉布」，令內委會經歷半年多、17次會議仍未選出主席後，其他立法會議員以至社會都意識到，唔改《議事規則》，立法會始終都有被騎劫嘅風險。從實務角度出發，修改《議事規則》，梗係襯依家立法會少咗反對派嘅時候做好佢，如果等將來立法會又多一批反對派政客（聲稱「愛國者」）喺度先修訂，廣男肯定無咁順暢，甚至會出現唔少枝節。 

圖片來源：中通社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk