「選唔選，諗下先啦！」、「空間窄咗喎，參選意欲會降低」，但凡有政制改革，而且唔係反對派要求嘅立法會全直選、特首「真普選」（不符《基本法》的），反對派點會唔反對？點會唔質疑參選路向？近日，囍雨又見到「老是常出現」嘅民主黨主席羅健熙出嚟「質疑」中央出手完善選舉制度，佢聲稱「民主派參政空間一定會收窄，雖然黨內未正式討論日後會否參選，但相信過去考慮參選的人，參選意欲會降低」。對於羅健熙嘅質疑或者疑慮，囍雨剩係問一句，「選」一個字，「唔選」兩個字，羅健熙諸多意見，咁民主黨之後係參選定唔參選呢？

黨內未有「正式討論」

對於民主黨日後會否參選，羅健熙表示黨內未有正式討論，但相信過去會考慮參選嘅人，聽到近日消息後，參選意欲會降低，並指以往「民主黨較多提倡不要放棄任何位置，但到今日要思考有關位置還有何作用，即使勝出，民主派在議會或選委會還有多少空間」。羅健熙一番說話嘅潛台詞，簡單而言，就係「民主黨批評，但民主黨無話唔選」！

首先，對於空間係咪「窄」咗嘅問題，囍雨覺得要搞清楚問題先，所謂空間「窄」咗，係咩意思？如果所講嘅係攬炒議會、癱瘓香港嘅空間，好明顯，唔係「窄」咗，而係無呢個空間，因為中央以至港府無可能俾反對派政客攬炒香港；如果所講嘅係議政空間，其實並無收窄到，對於政府施政、政策有質疑聲音，可以繼續，但如果係擺明反中亂港，咁當然要「出局」。大家應該反問民主黨一句，如果民主黨係愛國愛港，何懼之有呢？

議席多了 民主黨可「進攻」？

之前反對派不時話要「進攻」或者「攻佔」某啲立法會界別，依家議席多咗，如果民主黨係「愛國者」，其實佢哋一樣有機會去爭奪新增議席；可能大家會覺得無乜可能，但歷史告訴我哋，民主黨好多時其實係議席優先，論功能界別，之前新增嘅所謂「超級區議會」議席，都係屬於功能組別，民主黨咪一樣去選，作為曾經嘅反對派立法會「第一大黨」，會因為中央完善制度而放棄「議席優先」嘅策略？囍雨真心覺得未必！

當民主黨等反對派不斷質疑、攻訐甚至抹黑中央完善選舉制度嘅做法，點解佢哋唔諗下，呢個係佢哋想攬炒同鍊爆香港嘅結果？今次中央出手完善選舉制度，根本係民主黨等反對派「成功爭取」返嚟嘅！依家羅健熙不時出嚟批評制度，真係咁唔滿意嘅，點解又唔直接宣布民主黨退出以後選舉？之前大部分反對派政客決定延任立法會議員一事，囍雨睇到一樣嘢，就係議席真係「好緊要」！ 

圖片來源：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk