自從反對派「大台、金主、黨鞭」黎智英被捕同還押後，反對派大有一種「樹倒猢猻散」嘅景象，近日連一直堅實地支持「民主」運動嘅政治團體民主動力都宣布停止運作及解散；囍雨就喺度諗，當一直喺反對派「興波作浪」嘅民主動力都解散，係咪正式意味反對派嘅「攬炒」時代已經終結呢？同樣重要嘅問題係，如果民主動力或其成員有做過涉嫌違法嘅事情，係咪又會因為佢哋「停止運作及解散」而免責？答案當然係未必啦！

在《基本法》框架下服務社會？

民主動力決定解散，相信各界都唔會覺得意外，因為打從《港區國安法》立法到實施後，反對派重心人物已經一個又一個退出政壇甚至「離開」香港；神奇嘅地方在於，民主動力、其召集人趙家賢喺佢哋嘅「解散」聲明入面，竟然話「未來我們一定在《基本法》、《港區國安法》及「一國兩制」框架下，通過不同方式繼續為香港社會服務，奉公守法，維護香港繁榮穩定」，依家先講《基本法》、《港區國安法》？會唔會遲咗啲呢？

睇呢份聲明，囍雨睇到兩個字，就係「肉酸」！民主動力之前反政府就「係威係勢」，依家疑似驚咗《國安法》而解散，無問題，但點解之前唔講下《基本法》、一國兩制，依家先講呢？老實講，如果民主動力或者佢嘅成員之前有言行涉嫌違法，例如係《港區國安法》生效之後仍然違法，就算民主動力依家話自己守法，其實係無用嘅！

口出狂言的政治組織

當日有份搞「初選」嘅一個組織，民主動力之前嘅言行，的確令人咋舌，囍雨上網搵到一個佢哋眾籌嘅網站，啲內容都幾「語出驚人」，例如提到「民主派35+」，就稱「合計過半，才可光復立法會，奪回控制權，壓制港共政權，再繼而改革政制，建立民主政府」；提到市民「支持」，又指「我們需要你的支持，若能成功，光復ＸＸ時代ＸＸ便不再只是一句口號」。呢啲說話，係咩意思？相信唔駛囍雨解釋，大家都好明白啦！

如果當初無人疑似搞「攬炒」、奪權，相信不論係民主動力、趙家賢以其他反對派政客，今日都未必要落得如此下場。只可惜，歷史並沒有如果，只有因果，反對派包括民主動力無論點樣「洗底」，都可能洗不去罪嫌，或須「承擔責任」。  

圖片來源：RTHK、民主動力Facebook

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk