今日係初七人日，亦係特區政府放寬堂食限制嘅第一日，根據政府要求，顧客需要使用應用程式「安心出行」記錄資料，或者食肆為顧客登記個人資料；不過，有黃店抱住「你有張良計，我有過牆梯」嘅心態， 有啲就教人唔使掃二維碼，有啲甚至暗示可以填假資料。對於呢啲陽奉陰違嘅行為，囍雨只想問一句，如果爆發疫症而政府又因為有人唔守規矩而追蹤唔到相關人士，點算？黃店到底係想抗疫，定係只想搞對抗？

黃店的「陰招」

因為新措施嘅落實，有傳媒特意走訪旺角數十間「黃店」，有黃店就表示唔掃「安心出行」嘅二維碼都無問題，有黃店就話係咪要掃「未有定數」，有黃店甚至暗示可以填寫假資料等等。簡單嚟講，就係黃店為咗配合反對派支持者嘅想法，或者自己有意「對抗」政府，誤導顧客唔使掃二維碼或者登記真實資料。

囍雨覺得，抗疫就係抗疫，政治就係政治，喺抗疫問題上，任何人包括政客、黃店，都唔應該慘入政治手法處理；特區政府之所以要市民用「安心出行」出入食肆以至其他場地，係因為要喺有確診個案嘅時候，可以追蹤返去過相同地方嘅人士，叫佢哋檢測好，甚至要檢疫都好，目的係要消除疫症，係為市民福祉著想。依家部分黃店嘅做法，表面上好似「好型」，實則就係累街坊，如果喺佢哋嘅地方出現爆發而追蹤唔到相關人士，全香港都「多得」佢哋唔少！

有人反對「安心出行」，或者係因為怕個人資料、行蹤會被洩露，但囍雨想講，「安心出行」程式無須登記個人資料，出行紀錄只會加密存放喺用戶自己嘅流動電話，喺31日後就會自動刪除，亦唔會備存喺任何政府或其他系統內；喺呢個情況下，囍雨真心唔明白，啲人包括黃店到底要反對咩呢？唔通因為係政府推出嘅，所以都要先反對？

政府須加強執法

好明顯，政府措施未實施前，已經有黃店等想盡辦法想逃避，囍雨認為政府唯一嘅應對方法，就係要到各食肆加強巡查，如果有店舖唔守規矩，或者根本無做好資料登記工作，政府嘅執法部門就要認真考慮仲係咪要俾呢啲黃店做晚市生意。防疫抗疫，係整個社會嘅事，我哋唔可以俾小部分人破壞我哋全體抗疫嘅成果。

原圖：rthk

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk