諗起香港電台，你會諗起啲咩？罐頭刀？辱警？散播「台獨」訊息？答案係「以上皆是」。港台節目《頭條新聞》去年三集節目，被通訊事務管理局裁定違反《電視節目守則》，局方向港台發出強烈勸喻；涉事節目內容包括「驚訊」或「驚方訊息」環節，如果要囍雨用兩個字形容有關內容，就係「辱警」！對於港台被投訴繼而投訴又成立，大家已經「見慣不怪」；奇就奇在，「頻頻出事」嘅港台，囍雨到依家都好似未見到有人要為「問題」負責，一個提供公共廣播服務嘅政府部門「出事」，無人要問責，無人被解僱，亦唔見有人被處分，試問點會唔引起公憤。

具污衊或侮辱警員的效果

關於港台今次被投訴且又裁定違反守則，最主要嘅內容，就係《頭條新聞》中有幾集由藝人王喜飾演嘅「警員」由大型垃圾桶走出嚟，環節完結又「返回」垃圾桶，被通訊局認為具污衊或侮辱警員嘅效果；其他投訴成立嘅內容，則有節目播放葵青區指揮官謝振中出席區議會會議片段，但畫面出現多個「FAKE NEWS」（假新聞）同「謊言」標語，令人覺得警方「說謊」同製造假新聞，導致其聲譽受損，且無提供適當回應機會。簡而言之，就係「辱警」，或者刻意損害警方聲譽。

港台不斷被投訴，然後又不斷地繼續「錯」，囍雨首先諗到嘅問題，就係港台內部係點樣監管節目製作以至報道新聞嘅呢？以《頭條新聞》為例，囍雨作為一個小市民，見到有人扮警員繼而喺垃圾桶「走出嚟」，都強烈地感覺到警方被污衊或侮辱，港台製作人員、導演、監製以至更高級嘅管理層，睇唔到有問題？港台係咪要建立返一套對得住觀眾同政府嘅監管機制呢？

從未聽聞有人被處分

關於港台嘅新聞，囍雨留意咗都有三、四年，但奇怪嘅地方在於，港台試過辱警，試過涉嫌散播「台獨」訊息，試過扭曲暴徒佔領理大事件，點解囍雨好似就未聽過有人受到處分呢？廣播處長梁家榮，又唔需要問責辭職？道理其實好簡單，如果做錯嘢係唔需要負責、問責、處分以至被解僱嘅，咁市民投訴，通訊局裁定成立，港台嘅人可能只係「當唱歌」，下次繼續「想點做就點做」。

前排，因為港台誤導市民，令人以為政府喺佐敦封鎖區派嘅罐頭「無拉環」，搞到滿城風雨，噚日通訊局又裁定《頭條新聞》部分內容有問題，囍雨真心想知道，港台今次又會點回應？會唔會向警方道歉？廣播處長係咪繼續享受高薪厚祿？當一個政府部門唔需要向政府以至大眾問責，公眾對佢失去期望，實在合情合理。

原圖：rthk

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk