聶廣男,八十後,香港某大學畢業,主修資訊科技,I.T.新晉,靜待「上位」機會。對社會有不滿,未能置業,但比上不足,比下又有餘。傾向建設多於破壞,亦相信積極建言比將一切推倒來得實際。
作者其他博評
612基金「永續籌款」?
612基金「永續籌款」?

籌錢、缺錢、再籌錢、再缺錢,然後又籌錢 … 呢個係攬炒派政客或者組織嘅「籌錢循環」方程式,但隨住黑暴運動被撲熄,各個攬炒派組織包括「612基金」(專支援黑暴運動的被告)嘅籌款能力似乎都有所減弱,所以之前「基金」亦「告急」;近日「基金」又表示喺幾日之內已經籌得超過1,100萬元,感謝各捐款人嘅支持。廣男實在質疑,咁落去,「612基金」係咪會變成「永續籌款」、「永續支援反政府被告」嘅組織?如果係咁,佢哋嘅支持者真係可能要捐一世錢先得!

 

如水地捐款?每月捐款?

 

睇返「612基金」嘅網上公告,除咗籌款數字達標外,廣男最留意到嘅,就係「基金」呼籲其他人「如水一般靈活捐款」、「希望大家可登記月捐」;換句話說,「基金」除咗唔想一次過喺「基金」戶口積存太多錢外,佢哋係想支持者登記「月捐」,定期、乖乖地奉獻出金錢。

 

呢一種玩法,簡單嚟講,就係叫支持者「不停捐錢」甚至係「永續捐款」;但廣男就有問題唔明白,所謂「長貧難顧」,依家經濟又差,佢哋嘅支持者仲可以捐多幾多次?更重要嘅問題,就係「基金」曾經資助攬炒派組織租音響、搞活動等等,廣男亦都懷疑,「基金」一直演化落去,長遠會唔會變成個別攬炒派組織嘅提款機呢?

 

支援涉違法者嘅組織

 

廣男一直認為,「基金」嘅理念相當有問題,正常一班人犯法或者涉嫌犯法,社會應該做嘅事,應該係勸導佢哋要守法;但係由攬炒派政客成立嘅「基金」,就開宗明義籌錢,話要支援涉嫌違法嘅人,講白啲係支援可能破壞香港嘅人士;「基金」嘅存在,形同與社會、港人以至「法治」對著幹。如果有人要再捐錢,係咪應該諗清楚捐錢嘅目的同實質意義呢?

 

最後,對於「基金」成功籌到錢,有心水清嘅網民表示,「黃律師們今次發達啦」,無錯,「基金」嘅成立,其實無話邊個最開心或者邊個係贏咗,不過有人涉嫌違法,有人幫佢哋籌錢打官司,最「受惠」嘅,肯定就係收錢打官司嘅律師、大律師。難怪,有人話「基金」嘅存在,儼如係一個法律界嘅「保就業」計劃! 


圖片來源:612基金社交網頁專頁


請Follow我們的YouTube頻道:https://bit.ly/2kgU8qg


下載我們的手機應用程式,收看第一手精彩內容:https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

7
好正
2
心心眼
6
好好笑
2
令人傷心
9
嬲爆

評論