攬炒派政客都有一個通病，五個字：「貪勝不知輸」，做事無分寸、不知進退，咁結果當然係會輸到一敗塗地。今早警隊國安處展開大規模行動，先後拘捕53個喺去年參與「35+」行動同「民主派初選」（「初選」）嘅攬炒派政客，包括搞手之一戴耀廷，眾人被指涉嫌違反《港區國安法》中嘅顛覆國家政權罪。其實睇返「初選」本身，攬炒派就揚言係想奪得立法會過半議席，一旦計劃成事，就會集體否決所有政府議案同財政預算案，藉此癱瘓香港政府機關，從而脅逼中央。攬炒派做到咁盡，唔係以為會「無後果」啊？

揚言要否決財政預算案

自從戴耀廷喺舊年3月初提出「35+」計劃之後，攬炒派就密謀搞「初選」，諗住協調參選立法會嘅名單。去到舊年7月「初選」，唔少參選人仲簽咗所謂「墨落無悔」聲明，入面講到明「包括否決財政預算案，迫使特首回應五大訴求，撤銷所有抗爭者控罪，令相關人士為警暴問責，並重啟政改達致雙普選。」當時坊間已經質疑，如果「初選」目的係要達「35+」，以阻礙或反對所有政府政策，或者有違反《港區國安法》之嫌，依家警方嘅執法行動就係最有力嘅回應，亦係向公眾發出強烈訊息，只要有人涉嫌犯法，無論佢係咩身份都好，都要面對法律追究！

相信戴耀廷必然無好下場

攬炒派提出嘅所謂「35+」計劃，唔單止要同政府對著幹，直頭係要攬炒香港、想奪權，依家咪終於玩出火！廣男覺得，攬炒派竟然仲敢相信戴耀廷，跟住佢講嘅去做，咁樣肯定會出事嫁啦。戴耀廷之前提過嘅計劃，不論係「違法佔領」、「雷動計劃」等等，全部都係以失敗告終，攬炒派政客明明之前已經「中過招」，竟然仲未知驚，繼續同佢一齊搞「35+」，依家落得咁嘅下場。廣男只能夠講一句，一切都係自己攞嚟。

香港係中國不可分離嘅一部分，攬炒派唔洗妄想可以奪權，喺《港區國安法》之下，攬炒香港嘅計劃亦無可能會成功。任何企圖對抗國家、破壞「一國兩制」嘅亂港分子，注定唔會有出路，香港亦無空間畀佢哋任意妄為。

圖片來源：民主動力Facebook

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk