涉嫌干犯《港區國安法》等罪嘅壹傳媒創辦人黎智英，喺2020年最後一日要即時還押監房，等候終審法院下個月處理律政司就其保釋提出嘅上訴。消息傳出之後，前天主教香港教區主教陳日君呢兩日不斷「聲援」黎智英、為佢抱不平，簡單而言，就係詰問點解唔俾黎智英保釋？就算要等上訴結果，點解要還押佢唔俾「返屋企」？又唔明白有乜理由唔信佢「唔會潛逃」？囍雨睇完嘅感覺就係，陳日君作為收過黎智英錢嘅人，依家護主心切嘅言行真係做到出嗮面！

對於陳日君咬文嚼字爭拗國安法保釋條文嘅嘢，囍雨覺得呢一刻冇謂喺度泛泛而談，畢竟，法律問題應該交由法庭去處理；不過對於陳日君另外一啲觀點，囍雨就認為有必要商榷一下，例如佢提到「難道在上訴前應先假設高院法官錯了嗎？」、「把籠統的『勾結外國勢力』罪行和謀殺講成同級，我不知可用什麼詞來形容！」、「黎智英是一個極度緊張自己名譽的人…一定不會食言」，「你不相信一個人也該有一個客觀的基礎」云云，囍雨想先反問一句，陳日君講呢啲，又有咩「客觀基礎」？

誰能擔保黎智英不會潛逃？

首先請陳日君搞清楚一點，當日終審法院三名法官之所以批准律政司嘅上訴申請，其中一個好重要嘅問題，就係認為原訟庭法官之前批准黎智英保釋，的確好有可能錯誤詮釋《港區國安法》入面有關保釋嘅要求（即係第42條），呢個就係客觀基礎！至於係咪應該相信黎智英「唔會繼續犯罪」、「唔會潛逃」，囍雨就，話呢啲其實係「口同鼻拗」嘅問題，根本冇人能保證，因為如果黎智英真係要「走」，以佢嘅「身份地位」，相信唔會係咩「難事」；又或者如果佢要「繼續危害國家安全」，可能大把人聽佢「指示」，根本唔需要佢親自出手，呢啲「客觀基礎」，陳日君又能唔能否認呢？

再者，當陳日君提到控方將「勾結外國勢力」講到「同謀殺同級」嘅問題，又要請先搞清楚，重點係在於黎智英所涉嫌嘅罪責，如果一旦罪成，最高刑期可以去到終身監禁，講緊嘅係所涉罪行嘅嚴重程度問題；對於呢一類嘅「非一般嫌疑人」，唔俾保釋其實好正常，唔通陳日君仲認為「勾結外國勢力、危害國家安全」係小事？！

自認曾收黎智英二千萬元捐款！

至於陳日君講到黎智英係一個「極度緊張自己名譽的人…一定不會食言」，囍雨又係果句：邊個能擔保？「緊張自己名譽」嘅人就唔會畏罪潛逃？陳日君咁講又有冇「客觀基礎」？講到呢度，囍雨記得之前黎智英「保釋在家」期間，有媒體就見到陳日君都有份「上門探訪」，囍雨就好奇，既然依家陳日君咁為黎智英「抱不平」，咁當日佢同黎智英之間講過啲乜，又會唔會同大家交代下「以示清白」？仲有，陳日君早年已經承認以個人名義接收黎智英二千萬元捐款，當時自稱「敗家精」嘅陳日君已經講到明「黎智英捐了很多錢，百分百捐給我，沒有捐給教區」，而據媒體揭發，喺2006年至2010年間，陳日君就每年至少接受黎智英捐款300萬元，而2006年佢獲委任為樞機時，更獲捐500萬元，咁多錢陳日君係點用？內裡仲有咩內情？陳日君又會唔會同大家詳細交代下？

圖片來源：陳日君Facebook、中通社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk