自2013年開始，廣男就開始「留意」戴耀廷寫文，佢寫文章嘅一大特點，就係在於「龍門任佢搬」，例如佢開頭寫違法佔領、「公民抗命」，佢講到明會「承擔罪責」，但到真係俾人告果時，竟然唔認罪！又例如佢「反中亂港」，講到好有計咁，但當《港區國安法》立法，佢又即刻縮話要搞學術研究。今日，廣男有幸又拜讀到佢以《沒有民主，哪有良好管治》為題撰寫嘅文章，睇完成篇文，廣男有個大問題，就係爭取民主，包唔包括要用犯法手段爭取呢？

假民主 真獨裁

睇戴耀廷呢篇文，當然唔可以話佢表示「民主係萬能」啦，但綜觀佢嘅行文，包括稱「香港現在的局面，良好管治的不能達到，又缺乏公民授權，而二者是因果相連的，這樣失效的管治亦是難以長久維持下去」、「所有支持民主的人，不單因民主是人的基本權利，也因沒有民主，香港也不會有良好管治，更加要堅持到底，路才有機會走出來」等，佢大抵意思，都係民主喺今日香港，有「重要作用」。但廣男想指出，爭取民主，無問題，問題在於戴耀廷等人訴諸違法手段爭取民主，民主未爭取到，香港已經俾佢哋搞到「半活不死」！

先唔講戴耀廷等人爭取嘅民主係咪符合憲制框架要求，自2013年起，攬炒派爭取民主或者反抗政府嘅行動，先有持續79日嘅違法佔領，再有旺角暴動，去年更爆發黑暴運動；點解戴耀廷喺講民主嘅同時，又唔講下佢哋啲行動對爭取民主係好定唔好？泛泛而談民主，好多人都做得到，但廣男想指出，喺文明社會，人人平等，如果有人因為要爭取自己訴求而傷害他人，咁就一定唔得，甚至係反民主行為；而戴耀廷等人嘅言行，雖然舉起民主旗幟，但就行獨裁之實。

始作俑者 還想指點江山

有人話，戴耀廷係一個長年在象牙塔嘅「冷氣軍師」，廣男想講，戴耀廷嘅「橋」（想法），絕對係搞亂香港嘅一個大源頭；廣男想問下，經歷一次又一次搞局而失敗，戴耀廷仲好意思教人點做嘢、行咩方向？廣男恐怕，戴耀廷嘅指導未產生效用，又有好多「同路人」被佢攬炒咗。值得留意嘅係，佢會叫「其他人」爭取，但自己仔女呢？梗係唔會煽動出嚟啦，聰明的「中產精英」，只會煽動別人子女，你懂的！ 

圖片來源：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk