「聽到健仔正在流亡，自由地生活，我很欣慰，但亦為他所背負的感到難過。健仔案件一直是我耿耿於懷的警暴事件」；

「香港司法制度墮落，市民對法庭失去信任，是由眾多自甘墮落的法官一手造成的」；

「終審法院的幾位法官的判決，若不是趨炎附勢，則是嚴重離地、脫離民眾，可憐這已經是香港最高級別的法官的終極判決」；

「很多香港的法官，只埋首配合警方『抓犯』，努力確保被政權打壓的被告人出席不公義的審訊，對法律本身是否公正、政權有否違法濫權卻不聞不問」；

以上一番說話，出自已經潛逃英國，而且仲想繼續「支糧」嘅前立法會議員、中西區區議員許智峯（似乎還未辭職），當佢為暴動案「逃犯」曾志健講咁多嘢好似為對方「喊冤」，或者就其他案件批評法官嘅時候，容許廣男講一句，佢表面上係就唔同案件批評法官，其實當中嘅潛台詞係「司法不公，所以我『走佬』係有道理」，呢啲算唔算係兜個圈「撐」自己？

其實要戳破許智峯嘅歪理，只需要問幾個問題就可以。點解曾志健喺暴動現場中槍受傷？因為佢涉嫌襲警、參與暴動！點解政府要立《禁蒙面法》？因為過去一年幾時間，唔少暴徒蒙住面「打砸搶燒」！咁點解黎智英有一段時間被還押？因為佢涉嫌犯下嘅欺詐罪、《國安法》，都係可以判監以年計甚至終身監禁嘅嚴重罪行！最後一個問題，點解許智峯「如數家珍」地數咁多案件出嚟？因為佢要話俾人聽「司法不公」，所以佢「走佬」好有道理囉！

許乃讀法律出身

如果係一般人咁樣抹黑法官，廣男當佢哋對香港法律、法庭以至法官「一知半解」，但大家要知道，許智峯係一個喺大學讀法律畢業嘅議員，佢會唔知道喺《普通法》制度下，法官依據法理而判案或作出決定？喺香港法庭下，法官需要「配合」政府？又或者，法官有趨炎附勢，成為「政權的一分子」？原來當一個政客潛逃在外，自覺「安全」，要為自己「漂白」喇，就可以肆無忌憚咁抹黑法治同法官！

喺呢度，廣男提提大家，許智峯喺佢嘅社交平台文章尾段寫明「在光復香港這場革命中，香港人過往對法官及法庭的尊敬及信任，相信現在是時候放下，重新檢討了」，依家有人直認要「革命」，警方係咪要用埋涉違《港區國安法》嘅名義通緝佢呢？ 

圖片來源：許智峯Facebook、RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk