戴耀廷由2013年煽動「違法達義」開始，就不斷散播歪理，佢講嘅嘢通常有兩個特點，第一就係必定「反港府、反中央」，第二就係「語不驚人誓不休」。近日，佢以《帶着使命離開》為題撰文，建議離開香港嘅港人建立起「黃色香港海外網絡」，目的唔單止係要建立起避風港，仲要讓世界得更清楚「香港的故事」，又話《國安法》觸發移民潮。文章更引起內地媒體點名斥責佢嘅陰謀「拉人入伙、騙人入坑」。囍雨就覺得，所謂「海外網絡」，其實係咪一個黃色「走佬」網絡？

戴耀廷所講嘅，相信係攬炒派經常吹噓嘅「移民潮」，喺講「移民潮」之前，囍雨首要講，依家有一啲香港人要「走」或「移民」，移民故事，我哋的確聽到啲，但我哋聽得最多嘅，其實係一啲喺香港涉嫌違法、繼而潛逃嘅「走佬」故事，當中包括前立法會議員許智峯、羅冠聰等人，戴耀廷呢篇文章，會唔會想美化「走佬」故事呢？

外國也有《國安法》

至於其他「移民」，囍雨又要同大家分析下，香港由去年年中至今，政治以至社會環境係咪有改變？答案當然有，但原因係咩呢？原因在於過去一年幾時間，香港被黑暴運動蹂躪得「體無完膚」，暴徒「打砸搶燒」甚至殺人放火，有一段時間，唔少市民連街都唔敢出，喺呢個情況下，有香港人想走，絕對唔出奇。

有啲人包括攬炒派政客，可能會認為香港人要「移民」，係因為政府，因為《港區國安法》，唔關黑暴運動事。喺呢度，囍雨要指出兩點，第一係《國安法》生效後，香港雖然偶有示威或者零星暴力場面，但香港已經大致回復平靜，而且唔少帶頭「反中」嘅政客，已經「退出」或者走咗去外國，香港今日嘅穩定，當中好大原因，係因為有《國安法》；第二則係除咗中國（包括香港），其他國家例如美國、英國等，都有國安法，點解中國（包括香港）唔可以立法呢？

始作俑者 還是戴耀廷

「移民」去外國，有攬炒派政客或支持者非常強調嘅「民主」，但有咗「民主」，係咪一切都「藥到病除」呢？外國人歧視華人嘅問題，點處理？外國經濟、失業率高，又點應對？對於「外國月亮特別圓」嘅「想法」，講真，囍雨唔係好同意。

歸根究柢，香港今日政治環境有變，說到底又係「違法達義」嘅禍害，當初無戴耀廷之流自己犯法、教人犯法，香港今日都未必會咁；依家戴耀廷仲好意思叫人去到外國搞「黃色圈」？呢個始作俑者，係咪講緊風涼話呢？

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk