一名因為嚴重扭曲中國歷史、將鴉片戰爭形容為「英國是為了消滅中國內的鴉片而發動鴉片戰爭」而被釘牌嘅「前教師」，化名陳Sir接受媒體訪問，質疑自己被DQ一事已提升至政治層面，懲處完全不合比例，決意「上訴到底」。囍雨睇媒體訪問，佢嘅重點大致就係佢本身唔係教開常識科、歷史知識薄弱所以「搞錯咗」，但囍雨想指出，教師教學嘅重點，係要備課，如果連備課嘅基本能力同承擔都欠缺，咁係咪仲有資格教書呢？

憑記憶、搞錯咗？

根據傳媒報道，呢位嚴重扭曲史實嘅被DQ教師，承認自己歷史知識薄弱，又因鴉片戰爭內容只佔課堂內容小部分，「僅憑記憶講述，未有查找資料」。呢度衍生兩個問題，第一就係所謂「憑記憶」，到底記憶從哪裡來呢？囍雨中學時讀過中史、世史，腦海從未出現呢啲咁有違史實嘅記憶喎！

另一個問題，就當大家都出於「良好意願」認同涉事教師係記錯，但呢件事嘅重點，在於教師教書，事前係要備課嘅，如果連備課嘅工作都唔做好，咁係咪失職呢？備課既係工作，亦係承擔，如果有教師能力加上承擔都欠缺，咁教育界以至其他社會人士認為涉事教師唔適合教書，又怪得邊個？

把中國妖魔化了

涉事教師或者教協，或者會認為事件「被政治化」所以先會有呢個結果，囍雨用另一角度，其實事件唔係政治化，而係所涉錯誤嘅誤導成分太強；講開鴉片戰爭，將鴉片輸入到中國嘅係英國，發起不義之戰嘅又係英國，但涉事教師竟然將是非曲直完全扭轉，呢個錯誤實在大得很，而且有關錯誤，絕對唔能夠用本身唔係「教嗰科」作為卸責理由。

至於替涉事教師出頭嘅教協包括立法會議員葉建源，囍雨亦想質疑，之前另一小學嘅被DQ教師所做嘅教案流出，葉建源認為會影響到「上訴委員會觀感」，咁依家今次涉事教師高調接受唔同媒體訪問，套用教協邏輯係咪想影響上訴？又或者，之前宣道小學被DQ教師只做教案「無份教」唔應該DQ，今次教師自己教錯嘢又唔可以DQ，咁係咪不論教師「有教、無教」、「有錯、無錯」都唔可以DQ？講到底，又係玩包庇囉！ 

圖片來源：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk